Aizawl: Khawpui chhunga traffic jam nasa tak sutkian nana parking space tam zawk siamna tura sawrkar flagship programme, ‘Parking House Support Scheme’ (PAHOSS) hnuaia sum pek chhuah zat chu Rs. Nuai 1,132.30 a tling tawh a, kalpui chhunzawm zel tum a ni.

Assembly Budget Session neih meka Aizawl North II bialtu MLA, Dr. Vanlalthlana zawhna UD&PA changtu, Deputy Chief Minister Tawnluia’n ziaka a chhannaah PAHOSS hnuaia sum pek chhuah tawh zat leh kalpui chhunzawm zel tum a nih thu tar lan niin, Parking House Committee meeting vawi hnihna, ni 24.4.2019-in a rel angin PAHOSS hnuaia priority area tar lan a ni a, chungte chu Kulikawn, Dam Veng, Khatla, Dawrpui, Chanmari, Chaltlang, Bawngkawn, Thuampui, Zemabawk leh Vaivakawn te an ni.

ZALEN-in RTI hmanga zawhna a siam UD&PA department SPIO-in a lo chhan tawh danin Aizawla PAHOSS dawng turte chu North Zone, South Zone, East Zone leh West Zone-ah then a ni a, tanpuina dil mi 1,458 atangin mi 402 thlan tawh an ni.

Kum 2019 atangin Aizawlah kalpui tan a ni a, PAHOSS kalpuina sum chu state sawrkar sum atanga hmuh niin engtik thlenga kalpui tur nge tih chu sawrkar thutlukna tur a ni.

PAHOSS hnuaiah hian mi pakhata pawisa pek tur zat bituk a awm lo.