ZALEN November 10, 2024 : Cheng Nuai 1,136.40 sen tawhna, lirthei tam lutuk avanga Aizawl khawpui traffic tawt tiziaawmna tura duan, Parking House Support Scheme (PAHOSS) kalpui chhunzawm a nih dawn leh dawn loh chungchangah thutlukna siam a la awm lo.

ZALEN thudawn danin kum 2019 atanga Aizawla kalpui tan, PAHOSS hnuaiah garage (parking house) 19 sak zawh tawh a ni a, sak zawh tawha lirthei dah theih zat chu LMV 96 leh two wheeler 537 a ni.

PAHOSS kalpui chhunzawm chungchangah sawrkarin ngaihtuahna a hmang mek nia thudawn niin, thutlukna a la siam fel lo a. Kum 2019 atanga PAHOSS atana sum sen tawh zawng zawng zat chu Rs. Nuai 1,136.40 a tling.

Aizawla PAHOSS dawng turte chu North Zone, South Zone, East Zone leh West Zone-ah then a ni a, tanpuina dil mi 1,458 atangin mi 402 thlan tawh an ni.

PAHOSS kalpuina sum hi state sawrkar sum atanga hmuh niin, engtik thlenga kalpui tur nge tih chu sawrkar thutlukna tur a ni a, mi pakhata pawisa pek tur zat bituk a awm lo.

Parking sak zawh hun tura sa zo lo emaw, sa lo hrim hrim emaw, sak tura ruat sa aia tlem sak emaw an awm a nih chuan a tanpuina dawn sa chu 1st installment a dawn atanga 15% interest nen pek lettir theih niin, sak zawh tawh pawh a nihna tur anga hman a nih loh chuan building chu kharsak theih a ni.