Pakistan prime minister hlui, Imran Khan chu Supreme Court-in ei ruk thubuaia an man dan chu dan lo a tih hnuah Islamabad-a an manna atangin chhuah a ni ta.

Zirtawpni zan khan an party chuan Lahore khawpui panin a chhuak tawh tih an sawi.

Judge-ten Khan-a hi bail-a chhuah an phalsak a, heti a nih chuan amahin a hlauh, chhuah a nih ruala man leh mai theihna lakah chawlhkar hnih chu a him dawn tihna a ni.

Court chuan Thawhlehni tuma an man hnuah chhuah tura tiin May 17 thleng chu man nawn leh rih a theih loh a ti a ni.

Tunah man nghal thei rih lo mah se Khan-a ei rua an puhna thubuai erawh a la kal reng tho.

“Kan ram chhunga party lian ber chu high court atangin ruk bo leh hruai bo a ni,” tiin Khan-a hian court building-a a awm laiin AFP a hrilh.

“Mi firfiak angin min cheibawl a, hei hi chuan hlet a ni ang,” tiin man a nih hnua lungawi lohna nasa taka lantir chungchang pawh a sawi.

Khan-a hi Zirtawpnia a chungthu an rel hnuah khan court hung chhungah a awm zui reng a. An puhna hrang hrang zingah firfiaka che, ram do zawnga che leh ram tibawrhbanga chetna pawh a tel.

An puhnaah hian thiam loh a chang a nih chuan international cricket star thin hi inthlan chuh theih lo tura tih a ni thei dawn a, kum 2018 leh 2022 inkara prime minister lo ni tawh hi a dam chhunga politics-a inhmang tawh lo tur thlenga hrem hial theih a ni dawn a. Kumin kum tawpah an inthlang tawh mai dawn bawk a ni.

Khan-a hi Zirtawpnia court-a hruai a nih hian nasa taka ven niin amah thlawptute chu a chibai zauh chauh.

A chungthu an ngaihtuahnaah hian Chief Justice Umar Ata Bandial chuan court hung chhunga man a ni chu dan lo a nih thu a sawi.

An man dan kalpui dan zawng zawng chu ‘a bul atanga tih that leh vek ngai’ a nih thu a sawi bawk.