ZALEN, Dec. 01, 2024: Mizo pali inlanna tur, Hong Kong-a World Taekwondo Poomsae Championship khelh mekah Pansy Rampanzeli chuan Round of 16 a patlang zo ta lo mah se Korean company lianin sporsor turin an dawr nghal.

Kum 17 mi lek, Pansy-i hi world championship-ah hian junior individual category-a khel niin Round of 64-ah a awl (bye) avangin Round of 32 atang chauhvin a inlan a. Saudi Arabia nula, Zainab A. a hneh.

Inrinnia Poomsae chi hnih hmanga an inelnaah hian vawi khatnaah Pansy-i’n 3.380 hmuin Zainab-i hian 3.260-a hmu a. Vawi hnihnaah pawh 5.040-4.920-a hneh nawn lehin 8.420-8.200-in a thiam 16 zingah a inhlang kai. 

Round of 16-ah hian South Korean nula, Chae Won Seo nen inhmachhawnin a vawi khatnaah 8.780–8.400-in a umpha lo va, a vawi hnihnaah pawh 8.700–8.320-a ngam lo zui lehin a vaiin 8.740–8.360-in a tlawm zawkah a tang a, quarterfinal a thleng zo ta lo a ni. 

Mizo tleirawl hi kal zel thei ta lo mah se a inkhel entu, taekwondo khawvela company hriat hlawh, KPNP chuan inthehlar nana hman turin an dawr nghal.

KNPN hi taekwondo-ah chuan khawvela a ber tia chhal ngam an ni a. Taekwondo PSS (Protector & Scoring System) an siam hi larpuiin electronic scoring system an siam leh player-te an inhliam theihna laka an invenna pawh tha bera chhal theih a ni.

2024 Paris Olympic Games-ah pawh khan an PSS hi hman niin khawvel huap player tha rual an sponsor bawk a. Pensy-i khel an hmuh hian khel tha an tiin an duh hle a, an company bungrua leh uniform sponsor turin Mizoram Ameruer Taekwondo Association (MATA) hruaitute an be nghal chung chung a ni.

Pansy-i hi kum thum liam ta chauhva Exodus Taekwondo Club-a taekwondo zir tan ni mah se Mizoram leh India tan hnuhma chhuanawm tak tak a lo nei tawh a. Tunah hian national junior champion lai niin National Poomsae Champions of Champion a ni bawk. 

Mt Carmel School-ah pawl 11 zirlai, state chhung leh pawnah medal 64 a la tawh, Pansy-i hi Hong Kong inelnaa a kal theih nan hian Women & Child Development leh MATA tangkawpin an sponsor a ni.

Inrinni atanga tan, Hong Kong-a inelna hi Nilaini thleng awh tur niin India aiawh hian Pansy-i bakah Lalthlamuanpuia (U-30 team) H. Vanlalfela (U-30 team) leh Ruthi Zainunsiami (U-40 team) te pawh an inlan dawn a ni.