Mizo film industry-in bungthar a kai chho ta mawlh mawlh mai a, film genre hrang hrang pawh kan hmu chho ve ta mawlh mawlh mai. Horror lamah hun enge maw chen an reh hnuah OBG Production te chuan psychological horror movie thar min rawn chhawp chhuah sak leh dawn ta e. 

He movie-ah hian Mizo actor tha leh hming chher tak takte an rawn in lan nual dawn. A script hi Vanlalawmpuia (Opix Renthlei) ziah niin, ani hi 'Awma Ka Ni' tih film/script lo ziak tawhtu leh director kha a ni. Kima Renthlei (OBG Production) chu director a ni a, ani hi film siamah leh music video siam lamahte hming lo chher tawh a ni. PC Lallawmzuali chu co-writter niin, he movie-ah hian changtunu role a la nghal bawk a ni.

A changtute 

Chu mai a la ni lo, tun lai Mizo film industry-a actor kan neih that ber tih ngam Mizo Film Award-a Best Actor Award a zawna lo dawng tawh, Papuia Pachuau chu changtupa a ni. Horror movie sawi a pianga rilrua lo lang thin, model chhe lo em em Zuali Chhangte chuan 2nd leading role a rawn la dawn bawk. Tunlai thalai ten an star rawn em em leh social media lama mite hriat hlawh leh Mizo film-ah pawh lo in lan nual tawh Mary Kim pawhin he movie-ah hian role pawimawh tak a rawn la dawn bawk a ni. Social media lama hriat hlawh tak tak te, acting lama mithar ni si tha tak tak he movie-ah hian kan hmu nual dawn a ni. 

OBG Production kut chhuak “Thih Thlengin Aw” psychological movie lo chhuak tur hi a changtute enin an tha viau mai a, a phurawm tawh hle. Actor tha tak takte in lanna, story dangdai si horror satliah ni lo plot twist tak mai, rilru tibuai zak thei tur en tur a awm leh dawn. 

“Thih Thlengin Aw” movie hi kum 2021 Cctober thla khan script-writer hian a lo ziak chhuak tawh a, he story hi a taka tawng tute thiltawn behchhan a ziah a ni. Kum 2023 kum tawp lam khan a story hi changtlung zawka duan a nih leh theih nan, writer, director leh co-writer te chu thu khawmin a ai tha zawk turin an duang leh ta a ni. Anni pathum hi project dangah pawh an combination that zia kan lo hmu tawh a, horror movie kan lo hmuh thin nen khan tehkhin rual loh, story tha leh clinical taka duan a ni. 

Horror movie kan lo hmuh tawh thin dangte ang lo takin, movie-a scene kan hmuh zen zen ngai loh leh tichhuak hmasa ber tur ni bawkin, danglam tak leh dangdai tak min rawn chhawpchhuah sak an tum a ni. 

July 6 zanah

Kumin Febuary thla khan shooting neih zawh a ni a, shooting pawh a hautak hle. July 6, 2024 zan hian Vanapa Hall-ah tlangzarh a ni dawn a, a hmunah a duh tan en theih a ni ang. Ticket hi Rs. 100/- niin, a hmunah lei tur a awm ang. Horror movie tui mite tan chuan hmaih phal chi a ni dawn lo - Lersiaq Play-ah en theihin a awm dawn bawk.