Russian leh Belarussian infiam mite chu Paris 2024 Olympics-ah ram bik nei lo (neutral)-in an tel ve thei dawn ta.

International Olympic Committee (IOC) chuan Zirtawpni khan ram pahniha infiam mite hi flag leh emblem tel lovin an inlan thei dawn tiin thutlukna a siam a ni.

Ram pahniha infiam mite hi February, 2022 atanga Russia-in Ukraine a rûn avangin Olympic Games-a an inlan hi phalsak an ni lo.

IOC chuan mi mala infiam mi tel phalsak hi ‘mihring dikna chanvo inzahsak vang’ niin a sawi.

Ukraine chuan infiam mite khapna hi kaltlangpui a nih loh chuan Games hi an boycott ve thung tur thu an lo sawi tawh a; mahse, Sports Minister Vadym Hutsait chuan neutral flag hnuaia an tel a nih chuan an pawm theih tur thu July thla khan Reuters a hrilh leh tawh thung.

Kartir lamah khan Games-a telh thin infiamna pawl hrang hrangte chuan neutral-a an tel phalsak turin IOC-ah an lo thlen tawh a, an ngensak angin Zirtawpniah thutlukna siam a ni ta a ni.

“IOC executive board chuan international federation hnuaia dan anga inlan thei tura inhlang kai individual neutral athlete (ANI)-te chu Games-ah an inlan thei dawn a ni,” tiin IOC chuan thu a chhuah.

IOC hian sports federation-te hnenah an hnuaia inelnaah Russian leh Belarussian infiam mite chu team ni lovin, mi mal chauhvin an inlan thin tur a ni tiin a lo hriattir tawh.

Hetih lai hian infiam mi zingah Ukraine rûn thlawptu chu mi mal pawha an la tel theih chuan loh thu a sawi bawk.

Sports federation-te hian Paris inelnaa tel phak tur zawnna an kalpuiah hriat a ngaih avangin ram pahnih infiam mite dinhmun hi tichiang thuai turin an lo ti tawh.

IOC hian Russia Olympic Association chu October thla atang khan dan lova an ramin Ukraine ram chin a awpsaka regional committee palite an association-a a ziah luh avangin thu leh awm hma atan an zinga tel ve a khap a ni.

Paris Olympic hi July 26 leh August 11 inkara neih tur a ni.