Commonwealth Games champion Jeremy Lalrinnunga chu national camp atanga lak chhuah niin phai lam chanchinbute chuan an tar lang hlawm a, hetih a nih chuan a tum ber, nakuma Paris khawpuia Olympic Games-a tel a theih dawn ta lo a ang ta hle.

National camp atanga Mizo tlangval lak chhuah a nih thu hi Indian Weightlifting Federation (IWLF) President Sahdev Yadav-a chuan Ningani khan a sawi. 

Weightlifter hi a hnungzang hliam avangin US-a inenkawl tura tih a ni a, a kal duh loh avangin Asian Games leh World Championships-a tel tura trial neih tur camp atangin lak chhuah a ni ta niin a sawi tiin an tar lang hlawm. 

“Jeremy-a a inhliam khan inenkawl turin St Louis kal turin kan ti nghal a. Ministry (union sports ministry) pawh biain TOPS (Target Olympic Podium Scheme) kaltlang pawhin a tih theih a; mahse, amah hian a duh tlat lo a ni,” tiin Yadav-a hian thuthar lakhawmtute hnenah a sawi. 

“Talent nei tha tak a ni a; mahse, World Championships leh Asian Games-a inlan tur trial-ah a inlan thei dawn lo. A inpeih huna kir leh turin Army Sports Institute-ah thawn kir leh a ni ta a ni,” tiin a sawi. 

September 4 atanga Riyadh, Saudi Arabia-a tan tur, World Championships hi Paris Olympics 2024-a inlan phak tur zawnna pawimawh tak (qualifier) a ni a, heta a tel miau loh chuan Jeremy-a hi infiam mite tel châkna ber intihsiaknaah hian a inlan theih hmel ta rih loh anga tar lan a ni.

Ainawn Veng tlangval, Jeremy-a hi nikuma Commonwealth Games-a gold medal a lak tum khan a intina tawh a, a khup pawh a tina zui leh bawk. 

“Trial-a a inlan miau loh chuan intihsiaknaah kan tir thei lo a ni. Thla khat leh a chanve tal a chawlh a ngai dawn a, chumi hnuah training turin a lo kir leh ang,” a ti. 

St Louis, USA-ah hi Olympic silver medalist Mirabai Chanu-i pawhin panin Dr. Aron Horschig-a enkawlna hnuaiah a dam tan mek tawh a, hetah hian Jeremy-a pawh hi tirh tum nia sawi a ni.

National camp atanga lak chhuah ang leh US-a inenkawl tura tirhah a kal duh lo anga IWLF hotupain a sawi chungchangah hian Jeremy-a hi ZALEN chuan biakpawh a tum a, a la bepawp thei rih lo va. A nu erawh chuan engmah thil chiang an la hre bik lo tih sawiin an fapa chu Pune-ah chawlh hmanga a awm mek thu a sawi.

A nu chuan Jeremy-a hian a tir atangin Asian Games phei hi chu a inlan theih a beisei lo sa niin a sawi bawk.