India chuan July 16 atanga tan tur, Paris Olympics-ah infiam mi 117 chauh a tir dawn a, Olympic Games-a infiam mi a tirh tam ber dawttu tur ni mah se kum 2021-a Tokyo Games-a a tirh zat a phak lo deuh.

India hian Tokyo-ah khan infiam mi 121 a tir chhuak a, hei hi games neih tawh tum khata a tirh tam ber a ni a. Kuminah hian kawng hrang hranga tan lain tam zawk tirh tum hle mah se a phak ta chuang lo va, hmeichhia 47 leh mipa 70 an kal dawn ta a ni.

Athletics tia sawi mai thin, track & field huangah a tir chhuak tam ber a, 29 lai thawh chhuakin silai kap thiam 21 tirin a tam ber dawttu an ni.

Ritchawiah India aiawh hian 2021 Tokyo Games-a silver medal latu, Mirabai Chanu pawh a inlan leh dawn a, ani hi ritchawia a thawh chhuah chhun tur niin equestrian, judo leh rowing-ah pakhat theuh an tel dawn bawk.

Infiam mi tirh chhuah lamah India hi tawlh hnung hret mah se thil dangah a lawmawm lam a tawng ve thung a. Infiam mi leh anmahni puitu (support staff member) inzat chiah aia tha an kal dawn a, hmasawnna a ni a. Coach 67 leh buaipuitu dang 72 zet Paris-ah hian an kal ve ang.

Indian Olympics Association President PT Ucha pawhin, "IOA chu ruahmanna leh inbuatsaihnaah kan tang a. Tun hmaa infiam mi leh support staff kan tirh thin dan 3:1 ratio ni thin chu 1:1 ratio aia sang hretah kan kaipui thei a ni," tiin Nilaini khan a sawi a ni.

Tun tum games-ah hian Olympic medalist vawi hnih ni tawh, PV Sindhu leh Sharath Kamal te chu flagbearer an ni dawn a. Indian mipuite mit fukne ber tur erawh Neeraj Chopra niin Tokyo Games-a feikhawha gold medal latu hian lak leh ngei a tum hle.

Badminton men's doubles-ah Satwiksairaj Rankireddy leh Chirag Shetty te inkawp chu gold hlawhchhuak ngei tura beisei an ni bawk.

INDIA-IN INFIAM MI A TIRH ZAT

Archery - 6

Athletics - 29

Badminton - 7

Boxing - 6

Equestrian - 1

Golf - 4

Hockey - 19

Judo - 1

Rowing - 1

Shooting - 21

Swimming - 2

Sailing - 2

Table Tennis - 8

Tennis - 3

Weightlifting - 1

Wrestling - 6

Paris 2024 Olympics

Paris 2024 Olympics hi official tak chuan July 26-ah tan a ni dawn a; mahse, Nilaini lo awm tur atang hian football, rugby sevens, handball leh archery chu tan a ni dawn thung.

A hawnna inkhawm hi khelmuala ni lovin River Seine dungah neih a ni dawn a. Ni 18 chhungin infiam 32-ah inelna neih niin gold medal 329 sem chhuah a ni ang.

Medal sem chhuah hmasak ber hi official-a tan tukah neih hman beisei a ni a, a hnuhnung ber chu a tawp ni, August 11-ah neih tur niin hemi zan hian khar a ni ang.

Kumin games-ah hian infiam telh thar a awm nual a. Breaking, kayak cross, kite event chi hnih – iQFoil leh kiteboarding leh artistic swimming huang zauh hret a ni dawn a. Tokyo-a tel, baseball/softball leh karate te chu paih an ni ta thung.