Aizawl: Aizawl Municipal Corporation (AMC) chuan kum 2015-16 chhunga parking contract a tih chhuahah a chhangtu sang ber hnena contract a pek loh avangin 2015-2016 chhung khan Rs nuai 11.23  a hloh niin Accountant General in report-ah a tarlang. Accountant General report-in a tarlan danin AMC chuan parking contract chhanna 21-ah a chhangtu sang ber hnenah contract a pe lova, pek an nih loh chhan hi record hmuh a ni lo. AMC in contract chhang sang bertu contract a pek loh avang hian revenue Rs nuai 11.23 a hloh a ni. Mizoram sorkar in June 22, 2017 a tarlan dan chuan  khatih laia AMC Chairman kaihhruaina hnuaiah AMC Executive committee chuan parking fee contractor tur hi a thlang thin a. Contractor tlak nia committee in a hriat chu a pe mai thin niin tarlan a ni bawk. Thulaknain a tarlan dan chuan AMC hnuaia parking area 4 - Khatla Kawn to Nursery (Area no.12), Tuithiang, Bethlehem leh Bethlehem Vengthlang (Area No. 20), Saron Veng to Electric Veng via Chhinga Veng (area no. 29) leh Dawrpui Biak In to Bazar Bungkawn (area no. 26) ah te hian contract zat tura ruahman aia hniamin contract pek a ni bawk. AMC chuan parking contract a pek chhuah hnuah contractor te hnen atanga 2015-2016 chhunga pawisa a dawn tur chu Rs nuai 44.76 a ni a, hetah hian Rs nuai 41.60 dawngin Rs nuai 3.16 a kim lo a ni. Hemi chungchang hi sorkarin Accountant General hnena a sawi fiah dan chuan harsatna a awm avangin 2015-16 chhung hian contractor thenkhatte chhanna zat chu tihniam a ni.