Aizawl; Nimin zing dar 8 khan Health Minister Lal Thanzara chuan Mizoram in IMR a tihhniam lawmman atana a dawn sum hmanga lei Bolero motor 14 chu High School field, Zarkawt atangin a vailiam. Minister chuan, “Ramri atanga nau nei tur lo pan thin te avang leh ina nau neih tum, an beidawn hnua damdawi In pan chauh thinte vangin Mizoram IMR a san phah a ni,” a ti. Motor vailiam tak chu Nausen kum 1 hnuailam thihna thleng thin (IMR) ah Mizoram in hma a sawn avanga lawmman, sawrkar laipuiin sum a pek atanga lei a ni tih a sawi a. "Motor hi tul lova lei a ni lova, nu nau nei turte damdawi In a hruai nan leh thlah nante, thawktu ten hnathawh an vil nante tangkai taka hman tur a ni," a ti bawk. Minister chuan IMR tihniam tur chuan H&FW thawktute bakah nu te chu an hriselna ngaih pawimawha, zuk leh hmuam leh ei leh in ah fimkhur tul a tih thu a sawi. *****Kum 2009 ah Mizoram IMR chu 37 niin 2011 ah chuan 34 a ni a, hei hi hmasawnna nasa takah ngaiin central chuan vaibelchhe 31.32 chu incentive atan a rawn pe a. Kum 2012 ah 35 ah a chho leh a, mahse central chuan vbc.16.32 a pe leh tho a ni.