Kar hmasa lam khan London a fashion show pakhatah Arunachal nula pakhat chuan Mizo puan chei zia hawhin thuamhnaw hran hran a siamte chu sap model te a hak tira, ngaihven a hlawh zek bawk a ni. Heng thil hi social media leh chanchinbu thenkhatte'n an chhuaha thawm riva a awm zui lemlo nain, he designer hian Hmarchhak India te aiawha che chhuak angin a in sawia, Paris leh Milan lam pan a tum thu a sawi bawk. He thil thleng hi thenkhat chuan NE te tilartu niin an ngai a, Mizo zingah pawh social media-a lawmthu sawi an awm hial a ni awma, engpawh nise NE chu a tilar a ni thei a, lawm loh tur tihna ni lovin hei aia thuk zawk ngaihtuahna sen a ngai a. Mizo puan chei hmang hian sum engzah nge a huiluh anga, nakin zelah pawh eng ang nge a huiluh belh ang? A huiluh atang hian Zofate chanpual a awm dawn em? Engtin nge Mizo puanchei hi a hman ngawt theih? Tuin nge phalna pe? Phalna pe thei an awm reng em? Patent ( dan ang thlapa ta nihna nei thlap) thlapa inhman tir a ni em? He thil thleng hi a tha zawnga her a nih chuan thalaite tan kawng a hawng thei a, fashion kher ni lo eizawnna tlaka ngaih loh sum hnar ni thei a awm a rinawm bawk. Patent tur hian tunah hmalak mek a ni a, a hlawhtlin a nghahlelh awm rualin - 'Mizoram sawrkar pawh mumal taka a kalna kum 40 lai a ni tawh a, hemi chhung zawng hian sawrkar leh a hnathawk te hian 'patent turin engati nge hma an lak loh' tih rilruah a awm a. Hemi ah hian Art and Culture Department mawh nia hriatna a lian viau thei a, thui tak a dik laiin department thenkhat Horticulture, Education, Information and Public Relations Department leh a dangte huangah khung theih a ni bawk ang. Tumahin ngaihtuahna chang an hre lo nge? rawtna a tlang lo zawk. Engpawh nise 'patent' tura hmalakna chang hria politician kan nei hi a lawmawm viau e. Kan Hnam hian ram danga thuamhnaw awm lo a nei nuala, chung te pawh chu 'patent' vat a tha ang. Hemi bakah hian thil thar hmuhchhuah khawvel danga awm lo kawltu kan ni meka, sum chawi a tam avanga hmalak loha la awm mai mai te hi Sawrkar kuta dah lovin kan mihausa te pawh che ve sela duhthusam a ni. Tawnghuat thu loah, dam chhunga mahni thawhchhuah ei zo seng lo mai nilo tu leh fate thlenga rin theih sum nei an awm fur tawh a, luanchhuahna remchang a nih hmel e.Department 2/3 thawhhona chi 'subject' a awm fo thina chumiah chuan department hotute inhawn tawk loh avanga hmalakna a tlawlh tawh a nih chuan, chhuan lo awm leh turte ah mawh an phur thui tih hriat a tul ang. Department thenkhat hi chu hnathawkte tih mai mai/ tlin loh avanga tangkaina nei ta lo ang ni hian a hriat thina, a pawi ngawt mai. Hnathawh a chak zawk nan department then hran ngai leh a thar a thlak/din ngai a awmin a lang a, thenkhat hi chu an tel loin Mizoram a kal thei niin a hriat rum rum thin. Mizo rilru hrim hrim hi a 'bet' em ni aw a tih theih a, a ‘tha’ en thiam turin kawhhmuhtu an awm a ngai a ni. Kan ramah eng vak a la thlen loh vang nge ni, a tha leh chhia pawh nise mi ram thalaite ta tur emaw, mi rama thleng turah thil hrim hrim hi kan dah niin a lang fo thin. Thalai engemaw zat chuan football eizawn nan an hmanga, 'political will' a awm vang a ni a, chutih rualin a vaia hlawhtlin theih a ni loa vanneih, tihfuh te pawhin a hril tih hriat a tha. Eng pawh nise tuna thil thleng hi min kaiharhtu ah ang sela, mipui tana hnathawk te in enfiahna ni rawh se.