Aizawl March 6, 2023 : Land Revenue & Survey Board Vice Chairman Rochhunga Ralte, Ex-MLA leh MNF Adviser ni bawk chuan, "Pathian leh kan ram tan tih-ah kan hotute an dinnghet a, manifesto tihhlawhtlin tamtak leh pawimawh tak tak MNF in a nei. Inthlan hnuhnung bera vote nuai chuanga min hnehlo tuten, kan sawrkar dawn, an tih hi awih chi a ni lo," a ti. 

Mizo Hnam Run chhung inkhawmah Rochhunga Ralte chuan, "Kan hotute Pathianin finna a pe a. India ram danpuia tarlan (article 371 G, 4.3 para) angin, kan sakhua leh ram leilung humhalh tlat a ni a. MNF ministry hnuaiah ram kan zauh a, dan lova ramdangmi lo lutte vote paihsak mek zel. Sawrkar laipuiin ti lo mah se, kan sawrkar chuan raltlante a tanpuiin a tuamhlawm mai a. Citizen Amendment chungchangah pawh kan hotute an dingnghet tlat bawk a ni," a ti. 

MNF Adviser chuan, "Mizo Hnam tan MNF in thiltha tam tak a ti a. Assam Rifle Khatla Ram chhuhsakin, Mizoram New Capital Complex, MINECO-din a ni a. Fund awmsa awmloin, Durtlang kawng laih zauh niin, Aizawl khawpui kawng pawimawh laih zauh a ni bawk. World Bank kawng sial hna thawh niin ruahmanna siam zel a ni bawk. Ram rotling, Millenium Centre, bus leh truck terminal leh India rama a University tha ber zing a mi, MZU din a ni bawk," a ti. 

Land Revenue & Survey Board Vice Chairman chuan, "MNF sorkar hian manifesto pawimawh tak tak a tihlawhtling tawh a. Ram hmasawnna pawimawh tak, district pathum dinin hnathawk theiin a siam a. Sinlung Hills Development Council(SHDC) dinin hna a thawk mek a. Eirukna dotu pawimawh Lok Ayukta adin a. Vehicle tax pek dan a siam tha a, Aizawl hmun laili atangin Assam Rifles sawnchhuah anih theihnan theihtawpin hma a la mek zel bawk a ni," a ti. 

"Harsatna lian tak tak karah MNF sawrkar chuan kohhran leh tlawmngai pawlte tha taka thawhpuiin, hmasawnna tamtak hmuh turin a awm zel bawk a ni. Inthlan kan hmachhawnah hnehna kan chang deuh zel bawk a. Tun hnaia loan thami kan hmuh leh project leh hmasawnna pawimawh lo lut mek zelte hian eptute lu a tihai hle a ni," Rochhunga Ralte chuan a ti bawk.