Aizawl March 7, 2023: Mizo National Front, Sub-Headquarters, Lunglei, LMC campaign directorate huaihawtin 'Mizo Hnam Run' Lunglei-ah vawiin khan 'Mi thar lawmluh inkhawm' neih a ni a. MNF President Zoramthanga chuan LMC candidate tur engemaw zat tih fel a nih tawh thu leh sawrkar ngei tura hma an lak thu a sawi.

Lawmluh paha thu sawitu MNF President  Zoramthanga chuan vawiin chawhma thlenga LMC candidate tur engemaw zat an tihfel tawh thu te, campaign hunah sawrkar ngei tura hma an lak tur thu sawiin, LMC seat 11 awmah hian lak vek an duh thu leh Pathianin sawrkarna siam tura mamawh zat seat a pek tur thu a sawi. "Pathianin ka tawng ngaidam se, Pu Denga hova movement kan hruai mup mup lai khan, India sawrkar chuan engto tham khingpui an nei ta tih min hria a. London atangin Pu Denga koh chhuah a ni a. Hun a kal zel a, inremna thuthlung draft tute zingah 'inremna chhe ber' titute an awm thin hi mak ka ti thin. MNF history hi incheimawi nan tun politics-ah tuten emaw lukhuma khum zung zunga hak thlak zung zung chingte an awm. MLA tlemte te chauh kan neih lai, kan sawrkar theih loh lai khan, kan party-ah ka kaihruaina a sawrkar zawh ringlote an awm a. Pu Lalfakzuala hnenah President ka nihna min thlak turin Pu Tawna nen kan kal a. Ani chuan a lo pawm lo nasa mai a. Party dang hotute hian mahni President nihna mi dang kian tura an In-a kal chilh hi an awm ve hauh lo ang. MNF chu party entawntlak ber kan ni a, hnam thuthlung meichher vuan tlattute kan ni. Tui anga nghet lova awm ve thianglo kan ni," a ti.

"MNF chu kum 60 chuang rinawm taka kal kan ni a, Congress leh ZPM-te angin a nghingve lo. Lungawihlohna hote te in a ngam loh lungphum chunga rem chhoh kan ni. MNF atanga mawina leh ropuina khum chhuak, a tawp thlenga rinawm leh si lo a, chhuak leh te hi kal fuh an awm ngai lo a, a tawpah tumahin ka ui ka ar an ti ngai lo. MNF-in zalenna an sual tak tak lo titute an awm thin a, March ni 5, 1966-a thil thleng kha a rei tulh tulh anga thangthar ten hre rengin, Mizo nationalism an chawinung tawlh tawlh ang," a ti bawk

Pathian leh mipui zarah kumin kum tawp inthlanah sorkarna neih leh ngei an inrin leh an tum ngei thu a sawi a. Congress hian pahnih khat MLA an neih chuan an vannei hle ang. ZPM pawh Assembly Session neih zawh takah khan a dik leh dik lo tih an hriat chian loh pawh an au pui dum dum a, ngaihdam an dilte a ngai leh hial a nih kha. Kan sawrkar hi beihna lian tham eptute hian an hre lo a. Khawvel tibuaitu Covid kha phurrit a tling lo tite in an sawi mai mai," MNF President chuan a ti bawk.

Mithar lawmluh inkhawmah hian MNF Vice President Lalthlengliana leh MNF Adviser Dr. R. lalthangliana te pawhin thu an sawi a ni. MNF thuchhuak chuan MNF President Zoramthanga hian party hrang hrang atangin MNF-ah mi thar 101 a lawmlut an ti a, lawmluh zingah Lunglei ZPM Southern Headquarters Thalai President R.Malsawmkima, Thorang bialah ZPM Unit Vice President Zomawia leh ZPM Treasurer-te an tel niin an tarlang.