ZALEN November 3, 2025: Congress Bhavan, Lungleia vawiina mi thar lawm luhna hun an hman naah MPCC Treasurer Dr. Lalmalsawma Nghaka chuan thu sawiin, ZPM chu a hmain Pathian hla nen an campaign a, tunah chuan vai love song nen an campaign tawh tih a sawi.

MPCC Treasurer chuan, "ZPM hi MNF nen an danglamna a awm lo. MNF khan mipuite hnenah cheng nuai thum an zuar a, mi vannei bik hnenah cheng sing hnih sang nga an pe thei hram a. Tuna Bana Kaih policy ah pawh mi 700 vel chauh an thlang chhuak a. Congress party chuan mi nawlpui hmakhua ngaiin NLUP ah khan chhungkaw 1,43,000 chuang hnenah bul tanna tur kan pe," a ti.

Dr. Lalmalsawma Nghaka chuan, "Kum 2 lek chhungin rorel mek ZPM party hian an zia an thlak hlawk thei a. Kum 2023-a FCAA 2023 hlaua dan sakei tia do nasa ber thinte khan vawiinah chu a dan pass tu leh fak mawitu an ni ta. Kum 2023 inthlan hmaa Pathian fakna hla nena campaign thin te khan kum 2025 a nih meuh chuan vai love song nen an campaign ta a ni," a ti bawk.