Aizawl March 11, 2023: Vawiin khan ZPM Aizawl East-I Block chuan Thuampui YMA Hall-ah Block Conference an hmang. He hun hi ZPM Leader Lalduhoma  leh Working President K Sapdanga bakah General Headquarters atangin hruaitu engemawzatin an hmanpui, ZPM leader chuan hmasawnna a pawimawh rualin Pathian tel lo development a hlauhawm thu a sawi.

ZPM Leader Lalduhoma chuan, “Tunlai hian politics-ah harh tharna a thleng nasa em em a, party-ah hian rinawm tur a ni lo, a policy-ah zawk hian rinawm tur a ni tih thu dik pawmtu leh nunpui theitu kan pung zel hi a lawmawm hle a ni. Pathian leh mipui zara kan sawrkar ve hunah pawh Pathian leh mipui hmaa kan thutiamah kan rinawm lo a nih chuan min chhuahsan leh dâwn nia ti ngam awmchhun party kan ni. Party dang chuan an policy lam an sawi tawh lo a, party a rinawm an inzirtir thin a ni. Kawng dik lova min hruaitute zui hi mi dik lo nihna zawk a ni,” a ti. 

Congress leh MNF chungchang sawiin, “Congress leh MNF te kan hria a, an rorel kalphung chu kalphung hlui ve ve a ni. Chief Minister chair a thu an inthlak a, an party symbol a danglam a, an flag a inang lo a, kan ram an kaihhruai dan chu a inang reng a ni. He system hi keini chuan thlak kan duh a, kalphung thar kan sawi thin a ni. Keini chuan system kan thlak ang kan ti a, system tha hnaiah chuan thil tha tih a awl, system a that loh chuan thil tha a tih theih loh; kalphung thar atan chuan mi tha kan mamawh a ni,” a ti bawk.

ZPM Leader chuan, “Development hi mi tam takin an kalpui thei a, Modi te, Arvind Kejriwal te pawhin nasa takin ram an ti hmasawn thei a, mahse development ringawt hi a lo kal a lo kal chuan mihring an nuamsa tual tual a, zu leh sâ an chen tam tual tual a, an hrisel lo tual tual a Pathian an hlat tual tual thin a ni. Pathian tel lo development hi a hlauhawm a ni. Kan ram hian hmasawn se kan duh rual rual hian Pathian duh danin kan ram hi thang turin kan duh a ni. A ram leh a felna kan zawng hmasa ang a, kan ram politics-ah Pathian ram kan thlen tir phawt ang a, a dang pawh min pek belh zel dâwn a ni,” a ti bawk. 

Working President K. Sapdanga pawhin thu sawiin, "Kar hmasaah Lunglei Municipal Council inthlan tur avangin Lunglei lamah kan phei a, lawmawm em em mai chu inthlang tura kan inbuatsaihnaah mitin mai sàwn ZPM-in candidate in nei tha ber min ti a, kan khingpuite pawhin min pawm pui viau niin kan hria. Heng candidate kan neih theih nan hian kan hruaitute an thawkrim em em a, candidate inchuhna nasa tak kara candidate tha tak kan nei thei hi a lawmawm hle a ni,” a ti a. 

Sapa chuan, “Mipui sukthlek thlir hian sawrkar kalphung thar an nghakhlel hle tih a hriat theih a, tuna kan ram inrelbawl dan hi chuan kalkân a ngah em em a, hmun kilkhawr zawka mi ten sawrkar a awm tih pawh hre lo khawpin hmasawnnain a kalkân nasa a ni. Politics hi inbumna tur a ni lo a, ram rorelna tur a ni. Mipuite hian beisei an nei a, chu an beisei chu pe thei awm chhun chu ZPM hi a ni. Chumi pe tur erawh chuan kan thawkrim tur a ni a, thawk tam ber nih kan tum tur a ni,” a ti bawk.