Aizawl February 28, 2023: 2023 atana Mizo National Youth Front(MNYF) Executive Meeting hmasa bera thu a sawi naah MNYF President Dr. L.Thangmawia, MLA chuan, Chief Minister Zoramthanga chu rem leh rem lovin bei thin mah se, Pathian hruaina in a kaihhruaina hnuaiah hmalam an pan mek zel a ti. 

Vawiina meeting-ah hian MNF Thalai president chuan, "Nikum lama Sawrkar tur thawka thaw te pawh Budget Session a zawh dawnah meuh chuan hniam lam an pan hret hret zel a ni. Kan Minister-te an tha em em a, Opposition lamin sawiselna tur an hre lo va, Covid hripui leng kara theihtawp chhuaha an hmalakna te a rah kan seng chho mek a. Chuvangin, kumin inthlanpuiah pawh MNF-in hneh takin sawrkarna a siam ngei dawnin a lang. Kan elpui ber tur Party hi khawi party zawk nge ni ang? tih kan inrinsiak mek rih a. MLA ngah zawk leh a lian zawka inngai party pawh hunrei lote ah an chhungkhur buaina hi a puak keh lovang tih a sawi theih loh," a ti bawk. 

Thangmawia chuan, "Kan hun tawn mek hetiang a nih lai hian MNF thalaite hian kan elpuite chhiat avang emaw a lawm mai lovin, ram tana thawk tura kan inpekna zawk avanga sawrkar kan tum fo thin zawk tur a ni" a ti bawk.

Thusawitu dang MNYF Vice President Zodinpuia chuan 2023 kumtawp lama Mizoram inthlanpui lo awm turah MLA bial 40 zirchian tawhna atangin bial tinah MNF dinhmun a tha niin a sawi a. Sawrkarna nghet tak neiin Zoramthanga kaihhruai MNF-in hnehna a chang leh ngei dawn, a ti. Congress Party chuan India ram leh Mizoramah President an ruat fuh lo hle ni a a hriat thu sawiin, "An tan dinchhuah ngaihna a awm tawhlo a ni. Congress party workers-te tan beisei tur dang a awm tawh loh avangin an mipui zawng zawngte chu 'Pathian leh kan ram tan', thuthlung nghet taka vuantu MNF-a thawhho puiah ka sawm a ni," a ti.

MNYF Vice President chuan, ZPM chu inngahna mumal neilo; mi pakhat ngaihdan leh thusawi anga kal mai thin ni a sawiin, "Hunrei tak zawlnei inlarna changchawiin Ni (sun) an tuipui a, tunah chuan Ni eng hliahtu Lukhumparh an sawi mawi leh nasa tawh a ni. Mizoram Politics-ah innghahna lungphum nghet nei lo Party-a daihrei ngai lo," a ti.

MNYF Vice President Zodinpuia chuan, MNF thalaite'n ram leh hnam tan thahnemngai taka hma kan lakna ah Mizote hnama min dintu Pathian duh danin a kal em tih inzawh fo a pawimawh thu sawi in, thudiklo hmanga Politics-a inchirhthehna awm thin lakah MNF thalai hruaitute chu fihlim turin a chah.

MNF thalai Headquarters' thutkhawmna ah hian inhmelhriattirna leh kumthar intuaitharna neih nghal a ni a. Mizo thalaite tan tangkai zawka MNYF-in hma a lak theih dan tur te, ram pum huapa MNF thalaite chak zawka hmalak theih dan tur rel ho a ni. Vawiina MNYF Headquarters Executive Meeting hian resolution pahnih (2) a pass bawk.