Aizawl April 5, 2023 : Vawiin khan Lengteng bialtu, Sialkal Range Development Council Chairman ni bawk Dr. L.Thangmawia, MLA chuan a bialchhungah mi a lawmlut a, LMC inthlanah chak zo lo mah se, Pathianin hnathawk thei turin sawrkarna a pek leh ngei a rinthu a sawi. 

Lawmluhnaah hian Dr. L.Thangmawia chuan, "Lunglei Municipal Council-ah hnehna kan chang lo a, amaherawhchu, MLA inthlanah kan chak lo ang tihna a ni lo. ZPM MLA neihna thenkhatah pawh hian MNF-in Local Council kan lak vekna bial leh veng a awm nual tho a. Pathian khawngaihna zarah kan sawrkar hnuah MP, AMC, VC leh LC-ah te hnehna kan chang chho a, bye-election ah nise vawi thum kan neih tawh a, vawi hnih hnehna kan chang a, LADC leh MADC-ah te nen hnehna kan chang zel a ni," a ti.

MLA General Election ah Pathian khawngaihna in hehna an chan leh ngei a rin thu sawiin Dr. L.Thangmawia chuan, "LMC kan tlinlohna hi kan tlin leh na tura tanlakna tur tam tak kan neihzia min hriattirtu a ni zawk a. MNF MLA te kan thawhhhona a tha a, Covid reh hnuah hian Pathianin hnathawk thei turin sawrkarna min pe leh ang tih hi ka ring tlat a ni," a ti bawk.

Lawmluh atang thusawitu Vungmuanliana ZPM Adviser ni thin chuan thu sawiin, "2018 ah Kawlbem ZPM hi din a ni a, hun lo kal zelin hruaitu nihna inchuh vangin unit hruaitu hmasa te pawh min zah loin Unit thar min rawn din hnan a, baihvai taka kan awm hnu, nu leh pa nei tawhlo kha MNF party hi kan nu leh pa ni turin kan rawn lut ta a ni," a ti.