ZALEN September 13, 2024 : Vawiin khan Mizo Hnam Run inkhawm neih a ni a. Political Session-a thusawitu MNF General Headquarter NCC member R. Tlanghmingthanga, Ex-Minister chuan Mizo hnam leh MNF-a inzawm tlat a, Pathianin kan hnam hi MNF kaltlangin chhanchhuah a duh a ni, a ti.

Tlanghmingthanga chuan, "Kan hnam hi a dam tur a ni. Kan sakhua pawh a him tur a ni. Kan hnam hi intodelh turin ke kan pen a ngai."

"Kan hnam hi kan party duh dana kaihhruai mai chi a ni lo. MNF hi eizawn nana hman chi a ni lova, hrehawmna leh tawrhna leh thihna hial pawh tawh theihna hmun a ni a. Kan mimal duh dan tipuitling tura hnam run hi kal tur a ni lo. Mi te ber atanga a lian ber thlengin ram leh hnam tan kan kal tur a ni.

"Volunteer-a inpe hmasaber pawl ka ni. Kan intiamnaah chuan mahni inkalsanin kan chhuak a, thih huamin ram tan ke kan pen," tiin Tlanga chuan hnam movement-a an tel chhoh dan leh an hnathawh ropui tak a sawi.