Aizawl: Mamit bialtu MLA John Rotluangliana chuan, “Congress party kum 10 kan sawrkar chhunga kan tihdik loh leh pawi kan sawite Pathianin min ngaidam tawh a, kum 5 dang min extend leh dawn a, a term 4 na thlengin min sawrkartir dawn a ni,” a ti. Mamit West Block Congress Special Block Conference, Zirtawpni kaltaa Damparengpui a neih ah he thu hi sawiin John Rotluangliana chuan, “MNF party te hi kuthnathawktu mi harsate dawn tur NLUP dawn theih lohna tura court-a min khingtu an ni a. Kut hnathawka eizawng mi harsa zawkte hmelma an ni. NLUP thikin SEDP khawi atanga sem tur nge hriat miah loh nuai 3 sem an tiam a, pek chuan loh tur tiam ta rau rau chuan nuai 5 chuang te tiam law law se tha tur a ni,” a ti bawk. BJP chungchang sawiin an party President JV Hluna chu party hrang hrang 5-ah a awm tawh nia sawiin sum chungchangah an buai avangin sum kawl tur Treasurer Mizo pawh an inhmu zo lo niin a sawi a. BJP chuan MLA pakhat pawh an nei dawn lo niin a sawi bawk. Block Conference hi MPCC Driver Welfare Department, ADCC, MPYCC leh Mamit Central Block hotu thahnem takin an hmanpui bawk a ni.