November 12, 2023; A tlangpui a lakin, Aizawl mipui nawlpuiin Pathianni (Sunday) an la serh ṭha niin a lang a, Pathianni a commercial vehicle tlan erawh a tam a, ei tur zuar kawngsir a in pho pawh hmun engemawzatah an awm.

ZALEN in Aizawl khawpui chhung kawngpui dung a fan kualna atanga a hmuh danin, mipui nawlpuiin Pathianni an serh tha thawkhat a, khawlai a veivak tam berte pawh inkhawm thuamhnaw inbel te an ni a. Dawr pangngai inhawng hmuh tur a awm lo tluk a ni.

Hetihlai hian mipui mamawhna a san vang nge, taxi (2 wheeler/4wheeler) service a tam a, city bus thenkhat service an awm bawk.

Dawr pangngai nilo, kawngpui kam a ei tur zuar a inpho hmuh tur an awm nual a, chung ei tur zuar in pho te chuan an in hralh tha thawkhat viau thin niin ZALEN an hrilh.

Hnam dang (vai) ei tur zuar a in pu kual, kawngpui dung remchang lai a inzuar hmuh tur engemawzat an awm bawk.

ZALEN in a fan kual chin hi Aizawl mipuiin Pathianni an la serh ṭhat leh ṭhat loh tehfung atan a zau tawk lo maithei a, hetihrual hian mipui nawlpui tam zawkte chuan Pathianni hi an la la urhsun tih erawh ZALEN palai hmuh dan a ni. Hetihlai hian Sunday serh lo a, Inrinni (sabbath) serh kohhran erawh an awm tih hre tel bawk ila!