ZALEN February 22, 2026: Forensic Science Laboratory (FSL)-a mi thiamte chu kum 2000 atanga kumin January thlengin pawi khawihna hmun 1,815-ah kal tawhin 2024-2025 chhung khan tualthahna 20 an enfiah tawh bawk.

FSL-in an chhinchhiah a tar lan a nih danin kum 2000 atanga kumin January chhung khan pawi khawihna (crime scene) hmun 1,815-ah an kal tawh a, thubuai 16,509 an enfiah zo a. Hnuchhuina kaihhnawih peng hrang hrang an hmuh chhuah zat chu 1,85,698 niin pawikhawihna thubuai leh an endikna kaihhnawihah court-ah vawi 5,015 an ding tawh bawk.

Kum kal ta, 2024-2025 chhung khan FSL mi thiamten tualthahna thleng vawi 20 enfiah an nei a, mipat hmeichhiatna chungchanga pawikhawihna thleng 18 enfiah an nei a. Heng bakah hian pawikhawihna hrang hrang enfiah an nei bawk.

FSL hian police-ten an man pawikhawihtu hrang hrangte kutze thla (fingerprint) 5,982 an nei/kawl tha tawh a, FSL-in tun thlenga kutze thla an neihte hi pawikhawihtu convict (thiam loh chantir) tawh mi 3,373-te kutze thla leh pawikhawihtu an man tawh mi 2,609-te kutze thla a ni. 

FSL-a thawktute hi pawikhawihna hmun hrang hrangah kal kualin finfiahna awm thei angte an lakhawm thin a, pawikhawihtute manchhuahna kawngah police kutke tangkai ber pakhat an ni.