Aizawl: Dampa Tiger Reserve tihzauhna atana khaw sawnchhuah tura tih Serhmun West khua chuan sawrkar atanga an pawisa dawn tur an la dawn mai theih loh avangin an mangang hle a, hetih lai hian pawisa pek hun tur hi la sawi theih mai a nih loh thu Environment, Forests & Climate Change department hotute chuan Zalen an hrilh. Thudawn danin Dampa Tiger Reserve ram tihzauh nan hian Serhmun khua hi lak tum a niin khaw mipuite pawhin khaw danga insawn hi an remti a. Ruahman dan chuan chhungkaw tin hi nuai 10 theuh pek tur niin an duhna khua an pan dawn a ni. Serhmun YMA hruaitute sawi danin, “Insawnna tur hi a fel mai dawn nia an sawi avangin chhungkaw tam zawk chuan lo leh huan pawh kan nei ngam tawh lo a, chumai bakah chhuak mai tura sawi reng kan nih avangin kan in pawh kan thawm tha ngam tawh lo a. Mahse, chanchin lawmawm kan hriat mai loh avangin kan mangang tawh tak zet a ni,” an ti. Serhmun khuaah hian in 238 a awm nia sawiin khua hi sawn chhuah a nih chuan mipui tam zawk chu Kawrtethawveng lamah kal an tum niin Zalen an hrilh bawk. Serhmun khaw harsatna tawh chung changah hian Environment, Forests & Climate Change department thawktute chuan a tira chhungkaw/in 140 awmah a pun tak chiam avangin hmalakna a thuanawp a, Serhmun khua in chhawmdawlna tur sum an dawn tur pawh pek theih hun tur a la sawi theih loh niin an sawi.