Aizawl: Central YMA-in ILP check runpui Ningani zana an neihah Ramhlun South Branch YMA ten ILP fel lo an man mi 9-te chu Bawngkawn PS atangin motor a va laktir a ni a, driver Ramnghinglova hian an zinga pakhat chu Rs. 650 laksakin a lo chhuah a. Police hotu liante chuan a chungah disciplinary action lak turin Zirtawpni khan an suspend a, Departmental Enquiry kalpui mek a ni. ILP check runpuiah hian hriat theih chinah ILP fel loh vanga man Aizawl PS-ah 297, Bawngkawn PS-ah 255, Kulikawn PS-ah 78, Vaivakawn PS-ah 93, Zonuam OP-ah 55, Lunglei PS-ah 38, Serchhipah 19, Kolasibah 38, an vaiin 873 an awm a ni. ILP nei lote hi magistrate hmaah hruai sen an nih loh vangin Zirtawpni tlai khan District Judge 3 ten police station-ah hian an kalchilh a. ILP nei lo leh thi tawhte chu a hmunah chinfel nghal zel niin 8.30 PM thleng buaipui an ni a. ILP nei lo anga hnam dang khawm zingah thenkhat chuan ILP valid an lo kawl nual niin thu kan dawng bawk a  ni.