ZALEN October 30, 2025: Class 12 pass chin tan nakum atangin Pachhunga University College (PUC)-ah Japanese Language Study Centre din turin PUC leh JACEEX LL Ltd. Guwahati-in thawhdunna thuthlung, Memorandun of Understanding (MoU) an ziak a, Japan lam tehfung atanga level 5 atanga tan tur a ni. 

PUC Principal Prof. H. Lalthanzara chuan he study centre-a zir duh tan Class XII chin tan dil theih a nih thu ZALEN a hrilh a, a tlem berah mi 30 tal zirlai awm an duh tih Japan lama an thawhpui tur te hian an an hrilh tih a sawi. Mi 100 aia tam pawh admit thei turin an inbuatsaih thu a sawi bawk.

Bul tanna hi PUC hmun Aizawl-ah neih tur a ni a, chumi hnua zirzawm dan chu an thawhpui tur ACEEX LL Ltd. Guwauhati ten an buaipui dawn a ti. Japan atangin zirtirtu tur an rawn tirh mai piah lamah online-a class lak leh exam pawh neih tur a nih thu PUC Principal chuan a sawi a, Japan-a hna hmu te tan hian zirna sang zawk thlenga buatsaih tur a nih thu a sawi bawk.

Japan-a hnathawk tur hian Level 2 chin pass a ngai a, diltu pawh an thahnem tawh tih PUC Principal hian ZALEN a hrilh a, PUC kalchhuak te chu duhsak bik an nih loh theih loh thu leh heng Japaneses mi thiamte hian an zirlaite kaihhruai hna pawh an thawk tel dawn a ti. Japan lam chuan Mizote leh Japanese ten history-ah inanna an neih avangin mainland India ai chuan Mizo ten hamthatna an nei thei tih thu an dawn thu a sawi bawk.

Japanese Language Study Centre din tura thawh dunna thuthlung hi October 28, 2025 khan PUC Principal Conference Room-ah an ziak a. Inremnaah hian PUC aiawhin Principal, Prof. H. Lalthanzara'n hming a ziak a, JACEEX LL Ltd. Guwauhati leh Jaceex - Youth4Japan aiawhin Jaceex Ventures Director Founder Rajeev Gupta'n hming a ziak a ni. 

Japanese Language Study Centre PUC-ah zing dar 8:30 atanga dar 9:30 inkarah class lak thin a ni dawn a, January 2026 atangin class hi tan tura ruahman a ni a, Principal, Prof H. Lalthanzara chuan tuna mi bakah hian Korean Language Study Centre

din turin December thla hian MGH, Korea te nen MoA ziah hman an tum thu ZALEN a hrilh bawk.