ZALEN, July 21, 2026: Pawl tanchhan nei lo, Mizorama zirlaite chuan Delhi-a an zirlaipui leh thalaipuiten lungawi lohna an lantir mek an thlawpzia lantir nan Nilaini hian Aizawlah peaceful demonstration an huaihawt dawn.

Vana Pa Hall kawt, Aizawla chawhma dar 10:00 atangin hun an hman tur hi ram khawpui bera Jantar Mantar-a Cockroach Janta Party (CJP) leh All India Students Federation (AISF) te lungawi lohna kal mek leh anmahni thlawpa activist Sonam Wangchuk-a’n chaw a nghei mek an thlâwpzia lantîrna a nih thu Mizoram zirlaite chuan ZALEN an hrilh.

Peaceful demonstration huaihawt tur hi a tirah chuan CJP Mizoram huaihawt tur angin thu a darh hman a, ZALEN pawhin a hriat dan a ni a; mahse, a nih loh thu dawn leh a ni.

ZALEN-in thu a dawn zui dan chuan eng pawl bik mah huaihawt a ni lo va, zirlai pakhat chuan zirlai thahnemngaite huaihawt a nih tawp thu a sawi a, “Pawl hminga huaihawt kan duh lo va, tel tura sawmna video kha CJP Mizoram IG-ah min post chhawnsak mai a ni,” a ti.

CJP-in nawrhna an huaihawt chhan ber hi May thlaa NEET exam zawhna put leh a kaihhnawih a ni a, exam hnuah cancel niin zirlai maktaduai chuang an exam tha leh a, exam hmasa cancel a nih vang hian mi tam tak intihlum an awm phah a. Union Education Minister Dharmendra Pradhan-a chu he thila mawhphurhna laa bâng turin an phut.

CJP movement hi US-a awm Indian zirlai, Abhijeet Dipke-a’n online-a a din niin India a haw hnuah thla hmasa atang khan Delhi-ah lungawi lohna hi a lantir tan a. June 28 atang khan Wangchuk-a’n thlawp nan chaw a nghei a, ani hi ni 20 chaw a nghei hnuah police-in tihluihnain Inrinni khan damdawi inah an dah a, chaw erawh a la nghei zel.

Thawhtanni khan parliament panin thalai sang telin kawng an zawh a, police nen pawh an innawr hle a, hliam pawh an awm nual a. Thawhlehni khan Jantar Mantar-ah bawk pungkhawm lehin kawng zawh erawh zirlaite tawrh phal tawh lovin an kalpui tawh lo tih CJP chuan an sawi.

Thawhtanni zan khan CJP hruaitu pahnih leh Union Health Minister JP Nadda an inbia a, inremna erawh an la nei thei rih lo.