ZALEN August 5, 2023 : Ramngaw, nungcha leh tuihna humhalh kawnga thawktu hrang hrang kalkhawmte chuan tun hnaia Parliament-in a pass tak, Forest Conservation Amendment Act chu tha lo an tih thu an sawi a. He act duh loh lantir nan kawng zawh huaihawt nise an ti.

Synod Social Front Committee huaihawtin Zirtawpni khan ramngaw, nungcha leh tuihna humhalh kawnga thawktu NGO-te leh sawmbik mi thenkhatte chuan Synod Office Committee Room-ah hmalak dan tur an sawiho a. Sawihona hun hi Rev. V.L.Luaia Hranleh, Executive Secretary i/c Social Front-in a kaihruai a, hmalak ho dan tur kawng hrang hrang an sawi ho va, a tul anga la inrawn khawm zel nise an ti bawk.

Kalkhawmte chuan nungchate sa ei thin an la awm te, sa pel ching an la awm nual te, sairawkherh nena sava vehte pawh hmuh tur an la awm reng mai chu hmuh hrehawm an tihzia te, ram ngaw a chereu nasat tak em avanga tuihna kangchat awm ta teuh mai leh ram ngawte humhalh tul an tihzia te an sawi a. Tawih thei lo bawlhhlawh paih duhdahin a nghawng pawiziate sawiin environment humhalh pawimawhzia hi Sunday School-ah te, ni tin sikulah te, kohhranah te uar taka inzirtir a tulzia te an sawi a ni.

Hei bakah hian kalkhawmte chuan Mizoramin Riverine Forest Reserve area a neih mek chu sawrkarin a ngaihsak tawk lo nia an hriat thu leh RFR area chhungah mi mal ram nei an awm nual nia an hriat thu sawiin hmalak ran nise an duh tih an sawi bawk.