Aizawl Municipal Council sawrkar chu thenkhat tangrualin an vaw thla leh tawh a, term khat 'kum nga' a liam hmain vawi hnih a thlenna a ni. AMC chairman inthlak hian sawisel a hlawh phian a, hetiang chiah hian AMC sawrkar dinglai chu a hun hma lamah paihthlak a nih tawh vang niin a hriat a. Mipui lungawi lo thawm a ring khawp a, khawpui enkawltute hian an zahawmna an hum zawh loh a hlauhawm lek lek a, 'a thlang tlingtu mipuite an zah lo' tih tawngkam a leng nasa a, mipuiin an hmuh hniam palh hlauh chuan a nghawng a chhe viau ang tih a chiang a ni. Pawlitik kan hriat dan hi 'a dik tawk lo' niin a lang ta hial a, a sawifiahna tawngkam ah pawh 'khel' hman a ni lehnghala, a nawlpuiin an pawm dan hei hian a ti chiang thei mai awm e. 'Game' khelh anga ngai politician zingah an tam a, mipui rawngbawlna ai mahin eizawnna pakhat angah thenkhat chuan an ngai tih an tawngkam atangin a lang a ni. Ni e, pawlitik hi eizawnna chu a ni ngei mai a, hlawh neiin thlantlin te'n sawrkarna an siam thin reng a ni. Chumi rualin mipui rawngbawl an ni teh meuh bawk a, hei hian hlamchhiah a hlawh ta deuh niin a hriat rum rum a. Eng pawh nise, eizawnna anga pawmtute pawhin rinawm taka an thawh a ngai tho tho tih inhre nawn sela a tha ang. Sawrkar dinglai State emaw khawpui Council emaw diklohna hailan hi Eptu lam tih tur a ni a, a tum erawh 'sawrkar a inenleta a insiam thatna tur leh sawrkar tichaktu' a nih theih nan a ni. Mipui rilru hruai sual thei tura inbeihna a awm leh thin hian mi pangngai beng a ti thlep tih hriat a tha awm e. A bilha tho fuh lo, vawiin thlenga siamthat hleih theih loh a awm a, sawrkar hrim hrim chu eptu lamin a beih a beih turah ngaih a ni tlat mai a, hetah hian tu party mah an fihlim lo. Siamtha tura selna hi chu mi a nileng lo tan chuan tha taka dawnsawn a ni tlangpui a, thudik ziktluak loa inbeihna erawh chuan mipui rilru a ti khawlo vek thei a; mi nun a chhiat vek phah thei bawk. In sel danah pawh tawngkam uchuak leh awmze nei loa inpuh chhiatna chi chu media lam pawhin an tarlang duh tawhlo hial a ni a. Party leh party inbeih emaw atchilhna emaw hian chhungkua, khawtlang leh ram tan tangkaina a nei lo tih hi pawlitika inhnam hnawih te'n an pawm kim zan hunah kan zia mahna! Party hruaitute pawhin an hote an kaihhruai dan ennawn ngam sela rah tha a chhuah a rinawm tlat a ni. Aizawl Municipal sawrkar tharah hian party mite chu an lawm viau a ni thei a, mahse mipui tam zawk rilru a na a, ram leilung hmangaihna aiin thuneih duhna a lian zawk niin an ngai tlat a ni. Councillor thenkhat te pawhin chairman thlak hi tha an tih loh thu an sawi a, mahse mipuiin tun dinhmunah chuan councillor te hi inang khat vekin an hmu tan tawh a, AMC sawrkar hmasa zawk pharthlak a nih atang khan AMC a beiseina nghat ngam lo an awm tan tawh zawk a ni. Thiam zawk leh thiam lo zawk zawnga insawi fiah ai chuan khawpui tana hna an thawh dan atangin mipui te'n ngaihdan an siam dawn chauh a, an la siam lehzel bawk ang. AMC a councillor te hi party inthleina awm loin AMC ti zahawmtu emaw ti mualphotu an ni thei a, a mawh chu an kuta awm a ni. Council thuneihna mipuiin an palzam lohna turin an vai hian theihtawp chhuaha an tan tlan a tul hrih a ni.