Aizawl: Mizoram district 8 te chu huntiam chhung March 2018-ah pawna inthiar awm lohan (open defecation free)-ah puan kim an ni. Zalen palaiin PHE Secretary KT Beichho hnen atanga thu a dawn danin kum 2012 baseline survey ang chuan Mizoram chu pawna inthiar awm lohna (ODF free)-ah puan a ni tawh nia sawiin Siaha district hi certificate thawn a la nih loh avangin official chuan puan la ni lo mah se ODF-ah Mizoram chu a awm tawh niin a sawi. PHE Secretary chuan ODF-a Mizoram puan a nih vangin a hranpaa lawmman dawn tur a awm hran lo niin a sawi a. Mahse, Ministry of Drinking Water & Sanitation atangin infrastructure siamna tur vaibelchhe 30 an dawng dawn niin a sawi a. “Sum kan hmuhte hi fai pawimawhzia inzirtirna atan te, vantlang zun in leh ek in sak nan, bawlhhlawh paihna leh bawlhhlawh thenfai zel nan hman kan tum a ni,” a ti a. Sum lokal tur hi sawrkar laipuiin 90% leh state-in 10% a tum tur nia sawiin kumin sawrkar kumtharah chuan hmalak tan theih an beisei niin a sawi bawk. PHE department-in kum 2012-a baseline survey an neihah chuan thingtlangah ek in nei tha lo chhungkua 30067 an awm a. Inthiarna nei lote hi nei vek tura hmalak niin an neih kim hnuah BDO, DC leh state level committee ten endik lehin tha tawk nia an hriat chuan ODF certificate hi an pe thin a ni. Hetih lai hian urban (khawpui) lama ODF hma latu Urban Development & Poverty Alleviation (UD&PA) department lam chuan Mizorama town 23 awm zingah Thenzawl leh N.Vanlaiphai khua te chu pawna inthiar awmlohna ‘Open Defecation Free (ODF)’-ah puan theih a la ni lo niin an sawi a, heng khaw pahnihte hi April thla tawpah puan hman an beisei tih Zalen an hrilh. Thudawn danin heng khaw pahnihte hi khaw neitute chuan OFDF-ah an puang tawh a; mahse, endikna neih zawh a la nih loh avangin an puang ve rih lo nia thudawn a ni.