Chief Minister Zoramthanga chuan Zirtawpnia Mizoram Kohhran Hruaitute Committee (MKHC) kum 40 tlin Ruby Jubilee lawmna, Synod Conference Centre-a neih a hmanpuina ah Mizoram chu tling lo leh tha lo nia inhriain keimahni leh keimahni insawisel fo thin mah ila, pawnlam atanga min rawn thlirtute chuan mawi leh entawntlak taka min hmuh fo thin thu a sawi a. Mahni tlinlohna chauh hmu lian lo a, kan thatna te, kan theihna te tangkaia hmang zawk tur kan nih thu a sawi bawk a ni.

Chief Minister thusawi hian ngaihtuah a ti thui a, kan ram sualna leh fellohna chungchangah pawh a sawitu leh kan tanhmun a zirin inhnial theih tak a ni ang. Mi thahnemngai deuh te chuan Mizoram hi chhe lailet der, thil tha reng reng pawh awm tawh lo ang hialin an hmu a. Chutih rual erawh chuan mi thenkhat te erawh chuan Chief Minister sawi ang deuh khian ram dang ngaihtuah chuan Mizoram chu nuam tak niin an hmu bawk.

Mizoram hi a nawmna em em mai chu kan pipu te nundan mawi hi kan la chhawm tha hle a. Kan ram a ralmuang a, kan society inpawh tak mai te hi nuam kan ti a, hei vang hian state pawna hnathawk tura chhuah pawh hi kan hreh phah ni hialin a lang. A theih hram chuan Mizoram chhungah ngei hnathawh kan tum hram hram thin.

Mizoram hi han sawisel thin bawk mah ila kan kristianna leh tlawmngai pawl chak tak tak kan neih te avang hian kan la ziaawm hle niin a lang a. Kan politician te pawh hi a hunlai chuan han inbei ve deuh thin mahse hmundang te anga inhuat phah emaw awm lovin an inkawmngeih em em mai a. Kohhran lamah lah nise kohhran pawl hrang hrang an awm chungin thawhhona huang Mizoram Kohhran Hruaitute Committee an la nei thei zel a. Chutiang zelin tunlai kan buaipui em em drugs addict te pawh hi tam viaun in han sawi thin bawk mah ila veng hrang hrangah hian hetiang mi hi chu han chhiar tak tak hi chuan tlem te chauh an ni thin.

Heng a chunga sawi te avang hian kan tha ta viau e tihna lam ni lovin chhe lailet der anga sawi hi chu a fuh lo deuh niin a lang a. Kan chhiatna lai kan sawi tam lutuk te hi a fuh lo zawk em? Kan thatna lam te hi sawi tam ta zawk ila kan hlawkpui zawk lo ang maw? State tam tak hian kan inthlanna fel fai tak te hi an awt em em a ni. Chutih rual erawh chuan tuna kan thlen chinah hian duh tawk mai tur kan ni lo a, hmasawnna tur leh hmalakna tur tam tak kan nei a ni tih kan hriat thar a pawimawh. India rama kristian state nia inchhal ngam hian midangte entawn tlaka kan nun chhoh zel hi kan tih tur leh mawhphurhna a ni tih i hre thar leh ang u.