October 19, 2023; People Conference (PC) party chuan, an party General Secretary i/c publicity thin VL Thazova chu PC party atangin an hnawtchhuak.

Hemi chungchang VL Thazova, Dawrpui Vengthar hnen a party atanga hnawhchhuah thu an pek a tarlan a nih danin, "Kan party hming leh kan party thu ni miah lo a refugee puihna tur Art & Culture department hnenah Rs. 10,000 in dil a, pawisa hi la chhuakin, party ah in thehluh si loh avangin, April ni 14, 2023-May 13, 2023 chhung kan party a i nihna zawng zawng kan lo hlih sak tawh che a ni," an ti a.

Hei bakah hian, "October ni 17, 2023 khan dik lo taka kan party chhung chungchang phuahchawpin, Aizawl West II PC thalai Unit anga inchhalin, MLA inthlan lo awm turah MNF party candidate in puih tur thu press conference neiin in puang chhuak a, October ni 18, 2023 a party meeting chuan he in thiltih hi anti party activity ah kan ngai," an ti bawk.

"Hemi avang hian party meeting chuan kan party constitution Article XV section 2 (iii) tlawhchhanin kan party member i nihna kan titawp a ni," tiin hnawhchhuahna lehkha an pekah chuan an tarlang. 

VL Thazova hnena lehkha an pek ah hian an GS H. Lalremsiama leh president Vanlalruata ten hming an ziak.