Aizawl February 13, 2023: PC party chuan Mizoram State Assembly Session neih mêk-a sawihona neih thin ah MLA te'n hun dang zawng aiin inbuatsaihna an nei tha tawk lo, an ti a, Budget pharh tak zirho tura ni hnih inbuatsaihna hun Speaker-in a pek chu awmze nei taka hmang tangkai turin an chah.  

Mipuite'n kan aiawha ram rorel tura an thlanchhuah, MLA te tan inthlahdah a thianglo tih hriatsak turin PC Party chuan an chah. "Vawiin February 13, 2023- a Chief Minister Pu Zoramthanga Finance changtu in budget thlirho tura a pharh tàk, ni hnih (2) chhûng lo inbuatsaihna hun Speaker Lalrinliana Sailo-in MLA te hun a pèk mêk hi thahnemngai taka bawhzui a, awmze nei taka pass a nih theihna turin MLA te taima taka lo zir làwk turin PC Party chuan kan chah a ni," an ti. 

PC Party chuan, "Mizorama rorelna in sàng bera rorelna hi mipuite hmakhaw thil a nih avangin a zahawmin, mutmawh hnarmawha neih tak meuh tur a nih laia, mahni Party hamthatna tur ringawt engto a nei a, he rorelna inpui hlamchhiah khawp a Party-a mithar lawmluh leh zinchhuah boruak siam len tuma kan MLA thenkhatte an hmanhlel reng ringawt mai hian mipuite hamthatna tura hmalakna thil tam tak a tihsukuk phahah kan ngai a, pawi kan ti takzet a ni," an ti bawk.