Aizawl March 16, 2023: PC President Vanlalruata chuan thuchhuah siamin Chief Minister-in Mizoram leiba sawi nep a ti a, 'State dang te leiba zat ngaihtuah chuan ba lo ang tluk kan ni,' ti a sawi chu tha lo a tih thu leh pawi a tih thu a tarlang.  

Ruata chuan, "Kan ram sum leh pai dinhmun tha lo zual zel hi politician leh a mawhphurtu sawrkar hnathawk ten mangan puiin mutmawh hnar mawhah kan neih. Sawrkar hnathawk ten hlawh pawh a hunah an la hlei thei lo te, pawisa leng vak tlem avanga mipui harsatna te hi sutkian a ngai. Chumi atana mawhphurtu lian ber chu Chief Minister a ni a, a dawttu chu Finance Minister a ni. Tunah hian CM leh FM hi mi pakhatin a chelhkawp avangin a chelhtu mawhphurhna hi a lian zual hle a ni. Mawhphurtu pawh ni chiah lo te pawhin kan mangan pui tawh laiin a mawhphurtu berin vei hauh lo leh sawinep zawnga a che thin hi chu a demawm tak zet a ni," a ti.

PC Party President chuan, "Kan state leiba hi tunlai khawvela sawrkar leiba teh dan anga teh chuan, India rama ba hnem ber kan ni. Hei aia la mangan thlak chu kan sawrkar dinhmun a, leiba rulhna tur puk ngai khawpa kan awm tawh hi a ni a. Kan dinhmun tha lo hi sawinep tuma dam thei a ni lo a, tumna tak tak nena siamthat a tihdam ngai a ni zawk. A siamthat theih dan a awm a, siamthat ngei a ngai a ni," tiin, "PC Party chuan a siamthat theih dan tur kan hria a, siamtha thei tura thuneihna pe turin mipui kan ngen a ni," a ti bawk.