Aizawl February 8, 2023: PC Party hruaitute chu vawiin khan an Office lailâwk Zaluta building, Venghlui-ah an thukhawm a, he hun kaihruaitu an party President Vanlalruata chuan mipui hmuh leh hriat theih turin Party dangte 'Policy debate' neih pui atana sawmna Party tinte hnena ziaka thlen a nih thu a sawi.

Ruata chuan, ''MLA inthlanpui kum kan lo thleng leh ta a, Party hrang hrangin sawrkarna kan chana kan tih turte pawh sawiin, a then phei chu ziaka siamin, mipui hriat turin kan puangchhuak leh tan tawh a; Kan Policy inang leh inang lo te pawh a awm hlawm a ni'," a ti.

PC President chuan, ''Thil tha leh tha àwm tak, mipui duh zâwng tak tur ziah leh sawi hi thil har a ni lo a; A pawimawh lai chu 'kan thil sawi te a tihhlawhtlin theih tak zet em,' tih hi a ni. Hun kal tawh ah tihhlawhtlin leh theih si loh, sawi leh tiam a awm thin, inbumna ang hiala ngaih theih te pawh a awm thin," a ti. Ruata chuan, ''Mipuite hi thutak kan hrilh tur a ni a, kan thusawi te a tak a nih leh nih loh hriat theih dan tur kawng awlsam leh tha chu mipui hmuh leh hriat theih a 'Policy debate' neih hi a ni a; Chuvang chuan Party tin te debate neih pui atan kan sawm a ni," a ti.