Mizoram sorkar atanga pension hlawh la te an la dam ngei em tih finfiah mek ni a, Aizawl South Treasury Officer, Sangkhawma sawi dan chuan, kumtin November thla atangin pensioner te hi an la dam ngei em tih enfiah thin a ni. Pensioner te hi anmahni ngei emaw an aiawhte kalin an la dam ngei tih finfiahna certificate siam sak an ni. Aizawl South Treasury huam chhungah sorkar hnathawk pension tawh mi 7,000 chuang awmin, tun November thla chhung hian en zawh hman beisei an ni. TO chuan, pensioner-te sorkar lam atanga endik tura tih an nih chhan chu, pensioner thi tawh si, an aiawha hlawh la thei awm tawh si lo ten la dam anga pension an la lak thin zawnchhuah nan a nih thu a sawi a. Hemi hma lama an endiknaah pensioner thi tawh, thi lo anga hlawh la reng tam tham tak hmuh chhuah an lo nih thin tawh thu sawiin, heng an mi hmuh chhuahte hi hlawh la thei loa tihtawpsak an nih thu a sawi. Pensioner-te an la dam ngei em tih finfiah nan hian Gazetted Officer leh VC ten signature an lo pek thin thu TO chuan a sawi.