April 12, 2023; Tun dinhmun-ah (December 2022 angin), Mizoram sawrkar (Old Pension Scheme) hnuaiah pensioner mi 21,146 leh family pension la mi 9,506 an awm a, chumi atana sawrkar sum sen zat chu kum khat-ah Rs. Vbc. 1,713.93 (approx) a ni.

Assembly budget session neih zawh taka finance minister Zoramthanga tarlan danin, Mizoram sawrkar hnuaia Old Pension Scheme hnuaiah hian tun dinhmunah (i.e. December, 2022) ah pensioner mi 21,146 an awm a, heng pensioner-te tana kum khat (January, 2022 – December, 2022) chhunga senso zat chu Rs. Vbc.1463.18 vel a ni.  An zero hun tur chu an damrei zawng nen a inkaihhnawih avangin hriat theih a ni lo.

Old Pension Scheme hnuaiah tho tun dinhmunah (i.e. December, 2022) family pension la (family pensioner) mi 9,506 an awm bawk a, heng mite tana kum khat chhunga senso zat chu Rs. Vbc. 250.74vel a ni.

An zero hun tur hi family pensioner damrei hun chhung leh an chhung zinga danin pension la thei a tih dang an awm dan etc. nen a inkaihhnawih avangin hriat theih a ni lo.

Mizoram sawrkar chuan New Pension Scheme (NPS) chu 1.9.2010 atangin a hmang tan a, sawrkar hnathawk lak thar te'n pension hlawh an nei tawh lo. Hetihlai hain congress party (MPCC) chuan sawrkarna an chang a nih chuan OPS hman ngei an tum tih an puang mek.

Planning Commission deputy chairman hlui leh veteran policy maker, Montek Singh Ahluwalia chuan state thenkhatin Old Pension Scheme (OPS) hman leh an tum chu sum lama tlakchhiatna siamtu tur a ni tih tunhnai khan a sawi.

Punjab, Rajasthan, Chhattisgarh, Jharkhand leh Himachal Pradesh sawrkarte chuan Old Pension Scheme hi an hmang leh tawh a ni.