Kha maw... Milar nupui pasal neih kum kan tih reng kha! Gospel singer Pensy B. Lalthangliani chuan khiang a awi ve leh dawn ta - kumin zet chu milar zingah nupui pasal nei an kat ta nuk mai. Pensy pasal tur hi Richard Zongte niin, Tripura Civil Service a ni - July 20, 2022 ah an inkutsuih ang. 

Lunglei nula Pensy B. Lalthangliani leh Richard Jongte te hi Vanghmun, Tripura-ah an innei dawn a, July 14, 2022 hian man an inhlan ang. Man hlanna hun hi Lunglei lamah an nei ang a, inkutsuih turin Richard Zongte te khua Vanghmun, Zampuitlang lam an pan dawn a ni. 

Richard Zongte hi Pachhhunga University College atanga inzirchhuak niin, Pensy nen pawh hian tun hnaia inhre chawp an ni lo -  a hma atang daih tawha lo inhre tawh an ni. Richard Zongte hian M.Sc a zawh hnuah civil service exam a pe a, Tripura Civil Service-ah a inziak tling zui a, tunah hian Tripura Sawrkar hnuaiah Food & Civil Supply Department-ah Dy Director a ni mek. 

Amah hi inzirmi tak niin, kumin kum tir lam khan Gujarati te sumdawn dan chanchian ngaihnawm tarlanna 'Dhandha' sumdawnna tih lehkhabu chu Mizo tawnga letlingin a buin a tichhuak a, kumin chhunga lehkhabu lehlin hralh tal ber pakhat a ni nghe nghe. Pensy leh Richard Zongte te an kal zelna turah Zalen chanchinbu chuan duhsakna kan hlan e.