Mizoram UPC kohhran huang chhunga zaithiam inelna, Pentecost Fak Zai Grand Finale chu neih zawh a ni ta a, C. Lalhriatkimi, Chaltlang chu a thiam ber - awm ti lo an awm kher lo ang! May 27, Zirtawpni zan khan Fak Zai Grand Finale hi Dawrpui Multipurpose Centre-ah neih a ni a, mi pangain zaithiam ber nih inchuhin inelna hi an hmachhawn - music track leh live music hmangin inelna an nei a, a tawpah 'A saw raltiang tlangah' tih hla mawi taka satu Lalhriatkimi chu zaithiam berah thlan a ni ta a ni. 

Thingsulthliah tleirawl Rebek Vanlalnunpuii chu pahnihna a ni a, kum 16 mi lek zaithiam hi a kum naupan anga teh chi a ni lo - a awin ngaihno a bei a, mipui tan pawh a hlawh hle. Kolasib Tumpui tlangval Vanlalduhsaka chu pathumna a ni a, ani hian Mizo legend Rodingliana hla pahnih hmangin final a rawn hmachhawn a, a 'Leikapui style' zai ngei mai chu mipui lunglenna chawk thotu a ni. 

Bungkawn tlangval Michael CR Lalpianfela leh Bungkawn tleirawl K. Lalnunpuii te a sang pathum zingah an inhlangkai zo ta lo a, an zai erawh tum dang ang thoin beng a fahin a ngaihnawm hle. Pentecost Fak Zai Grand Finale-ah hian inelnaa telte bakah Mizo legend, 'Khawpui Mawi' hmanga Mizo mipuite min lo awi tawhtu Rodingliana, Tuinung lui hla lo 'hit' pui tawh thintu K. Vanlalhnema leh zaithiam chuai thei lo Rodingliana te an inlan bawk. 

Fak Zai judge Upa F. Vanlalchama chuan, "Sum leh pai, tha leh zung tam tak senga inelna buatsaih ni mah se, zaithiam tha tak tak, inup bo mai tur kan hmuhchhuah phah nual a, chuti zawnga a hlawkna thlir chuan kan insensote kha a thlawn lo a ni," a ti.  Pentecost Fak Zai hi General PYD Literature Committee leh Literature & Publication Board tang kawpin an buatsaih a ni a, Zonet chu media partner niin, anni hian inelnate an television channel kaltlangin an pe chhuak thin a ni. 

Pentecost Fak Zai Result
Pakhatna - C. Lalhriatkimi, Chaltlang
Pahnihna - Rebek Vanlalnunpuii, Thingsulthliah
Pathumna - Vanlalduhsaka, Kolasib Tumpui