Aizawl February 4, 2023: MZP bultumin Vawiin khan Aizawl khawpui kawn hrang hrangah hnam dang dan lova khawsa dapchhuah hnatlang neih a ni a, Inner Line Permit (ILP) nei lo mi sawmthum pasarih (37) chuang bakah kumtling lo hnathawka chhawr thahnem tak hmuhchhuah niin thuneitute kutah hlan nghal an ni.

MZP chuan Sawrkar leh thuneitute pawhin theihtawp chhuaha hma an lak mek lai a, Nikhat hnatlanna a hnamdang permit nei lova khawsa leh dan lova sumdawng thahnem tak man chhuah tur an awm chu pawi an ti. Hnam dang dan lova khawsate hi permit neilo bakah permit dam hun chhung zo tawh te an ni.

MZP chuan India danpuiin a bik taka min humhalhna dan Inner Line Permit (ILP) chu a nihna ang taka hmang tur leh a pekchhuah danah pawh fimkhur leh zuala kalpui turin thuneitute a ngen nawn. Mizoram chhunga Veng/Khua Local Council/Village Council thuneitu te, hnam dang ILP issue chungchangah document felfai lo chu hriatpuina lehkha pechhuak tawh lo turin an ngen bawk a ni. 

Dan lova hnam dang khawsa te dapchhuah hnatlangah hian MZP hruaitute bakah College Students Union(SU) hruaitute leh Hnampual Zirlai Pawl hruaitu mi thahnem tak an thawkchhuak a ni. MZP chuan hnam dang dan lova khawsa a hmuhchhuah te chinchang chu ngun takin a enzui dawn tih an sawi a, thawnkir (push back) an nih dan pawh en zui an tum. MZP chuan Mizoram chhung a dan lova hnam dang sumdawng te dapchhuakin a tul angin hmalak zel an tum a, hnam dang dan lova Sumdawng te dapchhuah kawngah MZP chuan Zoram mipuite thlawpna an ngen bawk a ni.