Aizawl July 4, 2024 : Congress Thalai chuan, "Ni 2.7.2024 (Thawhlehni)-a Lunglei District High Powered Committee Conference Hall-a Cabinet Meeting, Lungleia neihah sawrkar chuan Petrol leh Diesel chhiah (VAT) 2 % -a tihsan turin thutlukna a siam a. Ni 3.7.2024 (Nilaini)-a Aizawl Press Club-a Supply Minister B. Lalchhanzoa'n Cabinet rorel in a pawmpui tawh Mizoram sawrkarin ration Buhfai mipui hnena kg 1 cheng 15 a pek thin chu a leta tipungin kg 1 cheng 30 zela lei a ngaih tawh tur a sawi bawk. Petrol leh diesel man tihsan tur leh ration buhfai man zaa za dawrh maia a pung tur hian Mizoram mipui a thawng takzet a. Mirethei leh harsa zawkte khawsak a ti harsa zual dawn a ni," an ti.

Petrol leh Diesel chhiah tihpun a ni tur hian nasa takin Petrol leh Diesel man a tih san phah nasat hle dawn avangin lirtheia sumdawng mai ni lo, nitin eizawnga hun hmangte nasa takin harsatna a siam sak dawn. ZPM sawrkar hian an sawrkar hmain an in zawrhnaah eng chhiah mah an tih san loh tur thu te, Tax Holiday an puan tur thu nasa takin an lo sawi tawh chuan an rintlak loh zia a tichiang ah Congress thalai chuan a ngai a ni.

ZPM sawrkar hian sum renchem sawimawi chungin an theih dan danin mipui sum an chen hiau hiau zawk a. An Party mite duhsakna turin sawrkarah nihna sang tak tak siam chawpin; ZPM sawrkar chuan Mizoram sum dinhmun leh an inzawrhna ber an VIP kuthnathawktute harsatna pawh ngaihtuah lovin sumthuni nu, CM adviser, Board Chairman, Consultant leh Supervisor an ruat chawp vak vak a. Tunah MC Mayor, Dy. Mayor, Executive Corporator, Corporator leh Lunglei Municipal Council Chairman, Executive Councillor leh Councillor te hlawh an tipung leh hian kuthnathawktute hmuhsitna leh palzutnaah Congress thalai chuan an ngai.

ZPM sorkarin ram sum dinhmun ngaihtuah miah loa AMC leh LMC-a Corporator leh Councillor te hlawh punna hi a sang hle a. Aizawl Municipal-a Corporator te hian ₹ 23,500/- an hlawh mek a. ZPM sorkar Cabinet meeting-in hlawh tihsan an rawtnaah chuan Mayor-in ₹ 78,000/-, Deputy Mayor ₹ 72,000/-, leh Executive Corporator ₹ 55,000/- leh Corporator ₹ 50,000/- a ni a, Lunglei Municipal Council Chairman ₹ 74,400/- , Vice Chairman ₹ 68,400/-, Executive Councillor ₹ 52,000/- leh Councillor ₹ 47,000/- teh meuh an pawm hi inrenchem sawimawi chunga mipui palzutnaah Congress thalai chuan an ngaih thu an sawi bawk.

Sorkar kal ta MNF sawrkarah khan chhiah nasa taka tihsan a ni a. Electric, tui, Petrol leh Diesel man nasa taka tihsan niin, he’ng chhiah hrang hrang atang hian Vaibelchhe 126 (chhiah) vel mipui sawrfe in an la a. Tunah ZPM in chhiah an tihpun loh tur thu leh pawisa puk lo tura inzuar chungin, Vaibelchhe 1789 zet thla 7 pawh tling loah pawisa an puk tawh a. Hetianga chhiah an tihpun vak chhan hi an duhsak zawngte tihlungawina tura an pawisa senso khuhmawina tur tih a chiang a. Kalphung thar, enchhin tura inzuar ZPM leh sawrkar kal ta MNF sawrkar hi engmah danglamna awm lo an nih zia a tichiang hleah Congress Thalai chuan a ngai a ni.