PGA Tour-a vawi 82 champion tawh Tiger Woods  chuan thla sarih zet a chawlh hnuah karleh lama neih tur PGA Tour-a Genesis Invitational-ah a rawn kir dawn tih a nemnghet tawh a, thla sarih hnua a tournament khelh lehna hmasa ber tur a ni.

Tournament lian tum 15 zet chawi tawhtu Woods hian kum 2022 khan competitive event vawi thum chiah a khel a, a hnuhnung ber chu nikum July thlaa St Andrews-a Open Championship kha niin khami tum khan cut a paltlang zo lo a ni.

Kum 47 mi Woods hi kum 2021 February thla khan car a chesualin a keah hliam na tak a tuar a ni.

Los Angeles tournament turah hian inbuatsaihna a kalpui mek tih sawiin,"Kar leh lamah PGA Tour event tak tak khel turin ka inpeih tawh a ni," tiin tweeter lamah thu a post a ni. February 16-19 chhung hian Woods hian Riviera Country Club-ah Genesis Invitational a buatsaih dawn a, 2020-a Zozo Championship a khelh hnua non-major PGA Tour a khelh leh hmasak ber tur a ni ang. 

American hian kum 2022 khan competitive golf round 9 chauh a khel a, Open bikah cut a miss hnuah US PGA Championship aṭangin third round zawhah a inhnukdawk a, Masters-ah 47-na a ni.

December thla khan exhibition event The Match-ah a inlan a, PNC Championship-ah pawh a fapa Charlie nen an inlan bawk.