2023 Asian Games-a a inlan thei lo tura ngaih tawh, India football team chu an inlan phalsak an ni tih Nilaini zan khan puan a ni a, coach Igor Stimac pawh a phur nghal hle.

India-ah hian sports ministry chuan Asian Games-a team anga inlan ngai infiamnaah, Asia ranking-a No. 8 aia hniam an nih chuan tirh loh turin kaihhruaina (criteria) a siam a. India football team (hmeichhia leh mipa) hian hei hi an phak loh ve ve avangin inlan thei lo tur an ni a; mahse, mipui leh mi langsar tak takte nawrna avangin kawng a hawnsak leh ta a ni.

Sports Minister Anurag Thakur chuan Nilaini zan khan India football fan-te tana thu lawmawm hi Twitter-ah a puang a. “Good news for Indian football lovers!” tiin bul a tan.

“Kan national football team, hmeichhia leh mipa chu kan hmaa Asian Games-ah an inlan lan thei dawn. Ministry-in criteria a neih chu hlihsakin kawng a hawng a, tun hnaia an chet dan thlirin hawnsak an ni. Tha taka inlanin ram  an chawimawi ngei ka beisei,” a ti.

Nawrna a nasa
A bik takin India mipa team hian tun nipui an hmang tha a, an rama tournament pathum an khelhah an champion vek a, hei vang hian an laka mipui beiseina pawh a nei sang a, Asiad-a kal lo tura tih an ni hi an hre thiam lo.

March thla khan Imphal khawpuiah Myanmar hnenin Tri-Nation Cup an la a, anmahni aia sang zawk, Kyrgyz Republic an hneh bawk a. A hnuah Bhubaneshwar-ah Hero Intercontinental Cup leh Bengaluru-ah 2023 SAFF Championship nomawi an la leh.

Tunah hian mipa football team hi Asia No. 18 niin hmeichhia hi No. 11 an ni a, che tha tluang mah se sports ministry-in kaihhruaina a neih saah No. 8 hnuai lam kal a remtih loh avangin September 23 leh October 8 chhunga Huangzhou, China-a nghah tur Asian Games-ah hian kal a remti chuang lo.

Asian Games-a football team tirh loh hi Indian Olympic Association President PT Usha leh AIFF President Kalyan Chaubey inkara ngaihdan inang lo a awm vang nia sawi a awm bawk.

China-a football team tirh loh tur thu a darh chiah atangin fan-te an phun a, social media-ah lungawi lo thawm a ring a, thinrim taka âng chhuak pawh an awm.

Social media-ah hian hashtag campaign lian tak a kal zui a. Coach Stimac-a pawhin Prime Minister Narendra Modi hnenah lehkha thawnin Asian Games-a tir turin a ngen hial.

Ani bakah hian Indian international hlui - IM Vijayan, Bhaichung Butia, Subrata Paul leh mi dang tam takin social media-ah India chu tel phal ngei tura an duhna an aupui bawk.

Fans leh mi langsar tak takte au thawm chuan rah tha a chhuah a, Blue Tigers chu inkhel tura China-a thlawh luh phalsak an ni ta a ni.

Coach a lawm, a phur bawk
A team-in Asia-a inelna lian an hmachhawn thei dawn tih a hriat rualin boss Stimac chuan a hlim tak zet tih a sawi a, a phur hle tih Revsportz-in an kawmnaah a sawi nghal.

Croatian coach hian Prime Minister Modi leh Thakur-a chungah pawh a ngenna an lo pawmsak avangin a lawm thu a sawi a. An khelh theih nana fan-te atanga thlawpna an dawnah a lawm hle bawk.

Asian Games hi Olympic Games ang bawkin kum 23 hnuai lam tana tih a ni a, a aia upa chu player pathum chiah an tel thei a, hei vang hian Stimac-a pawhin inbuatsaihna a neihah pawh ruahmanna dang a siam a ngai dawn.

Thailand-a King’s Cup khelh hmabak an ni a, hei hi a inruahmanna hmasaah chuan kum thar tira AFC Asian Cup khelh tur inbuatsaih nana hman a tum a; mahse, a hmain Asiad khelh a ngaih dawn tak avangin Thailand-ah hian kum naupang zawk a hruai a ngaih hmel ta hle.

“Naupang zawkteah rinna ka nghat ngam a, eng nge lo thleng dawn kan la hmu ang. September thla tawp a la hla a, nasa taka kan inbuatsaih a ngai. A hmasa berah chuan King’s Cup hi inbuatsaih nan kan hmang ang a, hei chauh hi hun tha kan neih a ni,” a ti.

“Iraq, Thailand leh tu pawh hmachhawn dawn ila, inbuatsaih nan zel a ni a. Hei bakah hian Indian Super League (ISL) club-te kan ngaihchan a ngai dawn a, Asian Games atana player-te min petu tur an ni,” a ti.

“Fifa-in ram inkhelh hun a hawn lai a ni dawn a, tute pawhin phur taka player an thehchhuah phal ka ring a. Heng bakah hian hmabak hautak a la awm nual a, eng pawh ni se, kan football chhungkua hian min phuar khawm ang,” tiin Stimac chuan phur takin a sawi.