Aizawl: Public Health Engineering Deparment chuan Aizawl khawpui tui chawmtu Phase I pipe lian tia hriat hlawh chu tunlai hian a tharin an thlak mekin an thlak chhan chu a hlui tawh vang niin an sawi bawk. PHE hotuten an sawi dan chuan Phase I pipe hi kum 30 chuanga upa tawh a ni a, tunhnai khan Upper Khatla leh Lawipu bulah liantham deuhin a puak tawh a ni. “Tunah hian pump house No 1 leh No 2 inkar kan khawih zo ti tih tawh a, thal lai chuhin khawpui chhungah kan inbun a, Upper Khatla leh Tuikhuahtlang inkar kan phum mek a. Hemi kan zawh hunah Maubawk leh Lawipui lam khawih tum a ni bawk a ni,” tiin Zalen palai hnenah PHE hotute chuan an sawi a. Khawpui chhung chu May thla chawhma lamah zawhfel an tum thu an sawi bawk. Kum 30 chhunga pipe phum danah danglam a awm em? tih zawhna chhangin pipe te chu ‘coal tar’-in tuam vek an ni a, hei hian tuiek lakah a veng a, pipe chhung lam pawh mihring hriselna atana pawi lo (edible paint) rawng tha chi a hnawih vek an nih thuin PHE hotute chuan zawhna an chhang a. “Metre 1 a thuk zanin kan phuma, motor lian rit tak tak a chunga tlan pawhin a ti chhe pha lo,” tiin Zalen an hrilh bawk. Khawpui chhung pipe phum hi darkar 24 chhung thawh a ni a, shift 2 a then niin labour pawh Mizo hlir 40 hemi atan hian lak belh an ni. Phase I hmang hian ni tin tui litre Nuai 80 chuang pump thin a ni.