Aizawl April 14, 2024 : Public Health Engineering (PHE) Department chuan Zokhawsang Assam Rifles hnena tui an pek thin chu hun eng emaw chen an titawp a. An tihtawp chhan hi AR-ten dan an zawm loh vang niin thawktute chuan an sawi. AR lam chuan an tui inpek chu 'right to life' leh 'fundamental right' khawih niin constitution hnuaiah an chanvo a nih thu an sawi thung a. Sawrkar chuan AR chunga a tih tur ti loa ngaiin hmelma ang hiala beihna an tawk nia an inngaih thu an sawi bawk.

ZALEN-in AR atanga thu a dawn danin Zokhawsang-ah hian an mi leh sa 200 vel bakah zirlai 27 leh zirna kaihhnawih a thawk mi 13 an khawsa mek a. NIEDO hmanga din Centre for Educational Excellence, Skilling and Wellness-ah NEET, IIT JEE zirlaite awmin nasa taka tui harsatna an tawrh thu AR chuan an sawi a. AR lam hian PHE minister hnena thil awm dan hrilha tui pe tura an ngen hnuah pawh PHE-a Senior EE pakhat chuan hun eng emaw chen a pe duh chuang lo niin an sawi.

He thil thleng chungchangah hian ZALEN chuan PHE thawktute a be nghal a, AR lam hian tui meter an thlak duh loh vanga tui hi pe chhunzawm ta lo niin an insawi.

Hetih lai hian tui meter chhia vang hian Zokhawsang AR te hi March 25, 2024 atangin tui pek mumal an ni tawh loa, April ni 2 atangin a tawp hman nia thudawn a ni a. PHE in dan a neih para 1 (b) a inziak 'tui meter chhia consumer in an thlak hma chu flat rate emaw thla 3 khaikhawmna chu thla bi bill anga pawm tur a ni ang' tih chu Border Gaurding Force an nih avangin leh 'concerned citizen' angin a fuh chiah loh an tih thu leh hma la turin Sawrkar thuneitu te hnenah ziakin an thlen thung a ni.

PHE senior officer pakhat chuan thil awm dan sawiin, “AR hi Pathianni hian tui litre nuai 4 vel kan pe thin a, tui bill an chawi hnem avangin nikum August/September vel khan an complaint a. Kan enfiah hnuah an meter hi a dik lo (reading aiin 11.6%-in a sang) tih kan hmu a. Dan angin kan enfiah ni, January 23, 2024 atanga chhiarin thla hnih chhung (Mar. 23, 2024 thleng) a thlak turin kan ti a. Chhuanlam chi hrang hrang siamin 'grace period' chhung pawh hian an thlak duh loh avangin tui hi kan pe chhunzawm duh ta lo a ni,” a ti.

Tun hma deuh pawhin AR ho chuan tui bill an ba nasa thin nia sawiin, “Kum 2021 khan AR hian tui bill ba nuai 34 lai mai an nei a, an pek that duh loh avangin tihtawp (disconnect)-ah kan vau a, hei vang hian an pe ta chauh a. AR hi dan chunga lengah an inngai emaw ni chu aw a tih theih hial a ni,” a ti.

AR chuan tui meter thar lei tawh mah se an la vuah thei lo tih sawi bawkin, “Kan danah chuan tui meter reng reng a dik leh dik loh Legal Metrology department-in an enfiah a, an pawm hnuah chauh vuah theih a ni a. AR tui meter hi 150mm a nih avangin Legal Metrology lam hian an test thei lo a. Mahse, company lamin a dik a ni an tihna, ‘tested ok’ an tihna min lo thawn ula, kan pawm mai ang kan ti chungin min la thawn chuang lo a ni,” a ti bawk.

PHE thawktute chuan thuneitu sang lamin an hrilh angin tun hnaiah tui chu an pe leh tawh niin an sawi bawk.