Aizawl: Public Health Engineering Department leh Young Mizo Association tangkawp chuan tuihna humhalhna kawnga hmalakna chikhat atan Chalfilh leh Hmuifang tlangah hma an la mek. PHE hnuaia CCDU thawktu ten Zalen an hrilh danin tuihna humhalh kawnga hmalakna chikhat atan Chalfilh leh Hmuifang te chu pilot project hmangin zirchian phawt a ni a. Chalfilh tlang leh Hmuifang tlang ramngaw hmang hian khaw thahnem takin tui an hmu thei a, heng tlang a thing leh mau awmsa te chu humhalhin a chereu loh nan hma an la tih an sawi a. Tun dinhmunah chuan mipuite hnena zirtir (awareness campaign) bak thildangah hma an la lutuk lo nia sawiin kumin atang chuan thingphun beihpui thlak an tum a ni CCDU thawk tute chuan Mizoram ah tuihna awm thin chu a tlem tual tual tih sawiin hei hi a chhan ber chu ramngaw tih chereu nasat (deforestation) vang a ni tih an sawi a. Ramngaw chu tuihna siamtu tha tak anih mai bakah ruahtui kalral tur lo venghimtu a ni a, thing leh mau a chereu nasat avangin leihnuaia lut tur ruahtui te chu an kangral ta mai thin tih an sawi. Thingtlang hmun tam takah Tuikhur tui a kang chat tih sawiin hei hi mihring pun thut vang lam ni lovin thing leh mau chereu vanga tuihna a awm tak loh vang niin an sawi bawk. Hetih lai hian Khawzawl leh Kanghmun khua ah te chuan ramngaw an cheithar leh a, an tuikhur kang chat tawh ah te tuihna a awm leh niin an sawi. An hmalakna chu PHE chuan a zirlet dawn tih kan palai an hrilh bawk.