Nikum NBA finalist Phoenix Suns neitu Robert Sarver chu NBA-in a chhui chian hnuah, hnuai chhiah leh mawi lo taka hmeichhe chunga a chet bakah chi inthliarna lam hawia a khawsak avangin kum 1 chhung suspend leh dollar mtd 10 chawi tura tih a ni. 

NBA hian Sarver hi khawsak dan phung pangai piah lamin a khawsa ngei a ni tih an finfiah a ni. Chi inthliarna rawngkai tawngkam a hman bakah, hmeichhe hnathawk te chu hnuai chhiah taka a cheibawlin zahmawh rawngkaiin a tawng bawk tih an hre hhuak bawk. Heng a thil tih mawi lo tak tak avang hian a chungah hremna na tak hi an lekkawh ta a ni. 

A chungchang chhuitute hian, November 2021-a ESPN article chu chhuih zuiin, mi chi hrang hrang 320 zet an kawmkual bakah document leh videos 80,000 zet an endik hnuah hetiang thu tlukna hi an siam ta a ni. 

2014 kum a Los Angeles Clippers neitu, Donald Sterling-a dam chhunga NBA-a inhnamhnawih thei tawh lo tura an hrem ai kha chuan Sarver-a an hremna hi chu nep tak a la ni. A ni pawh hi chi inthliarna lam hawi a chhak chhuah vang a ni. A hnuah Clippers hi hralh tura nawr luih niin mi dangin an lei zui bawk.