ZALEN October 14, 2024 : Mizorama ration card nei thin, Tripura lama Aadhar leh ration card link vanga Jampui tlangdung, Phuldungsei khuaa Mizoram lama ration la zui thei ta lote chuan tun thlengin Mizoramah ration an la la chhunzawm thei lo.

Food Civil Supply & Consumer Affairs (FCS&CA) tar lan danin, Tripura lama Aadhar leh ration card link tawhte chu Mizoram lama ration card management system (RCMS)-ah an lut ve thei tawh lo.

Mizoram lam RCMS-a lut thei ta lote hi a tirah mi 85 an ni a, mobile seeding kalpuiah mi 256 lut thei lo an awm a. Mobile Seeding kalpui a nih avangin Tripura-a Aadhar leh ration card link tawhte chu Mizoram RCMS-ah dah luh theih an ni tawh rih lo.

Phuldungsei khua atanga ZALEN thudawnna chuan an khuaa ration card chungchanga harsatna tawkte chuan tun thlengin Mizoram lamah ration an la chhunzawm thei lo tih an sawi a, a hma chuan an khua atanga km 4 vela hla, Zomuantlang-ah ration an la thin niin a sawi.

Hemi chungchangah hian Mizoram lama ration la thin, kumin April leh May thlaa an ration card tihtawpsak Jampui tlang dung, Phuldungsei khua mi thenkhatte chuan lungawi lohna an lo lantir tawh a, MNF party pawhin Mizoram sawrkar demawm an tih thu te, khaw dintu Hrangvunga Sailo, Mizoram sawrkar lo awm tawh te, Mizo mipui leh Phuldungsei khua bakah, Mizo hnam pawikhawihna a nih thu an lo sawi tawh.