Aizawl: Champhai a lut leh chhuak bungraw phur lirthei-ten tlan velten Champhai panna kawngpui an rahchhiat nasat lutuk vang leh Champhai leilet zawl,  buhbal chinna hmun a chenna in leh bungraw dahna kudam sak mekte chu dan phalloh anih ang a khuah khirh anih theihna turin Zirtawpni khan DC Conference Hall-ah Additional DC Lalsangpuii Hmar kaihhruaiin District Level Meeting neih a ni. Addl. DC hova thukhawm chuan lirthei lut leh chhuak phurh rih dan tur bithliah siamin lirthei ke 6 nei tan Kg 9450, ke 10 nei tan Kg 12600, ke 12 nei tan Kg 17100 nise an ti a. Hemi chungchanga hmala zui tur leh lirthei phurh rih dan lo enfiah tur hian Mizoram Police leh District Legal Metrology te ruat an ni a. District chhung kawngpui kam khawtin a VC leh YMA-te chu a tul anga lo puibawm tura ruat an ni. Meeting chuan lirthei phurh tawk tura ruat aia tam bungrua phurh an awm chuan bituk aia tam bungraw chin zawng chu hlan thlak nghal nise an ti a. Kawngpui chhia te chak zawka cheithat anih theih nan leh kawngpui tihchhiat a nep theih nan sumdawng, bungraw neitute leh lirthei neitute hnenah pawh ngenna siam nise an ti bawk. Hei bakah hian Champhai zawl leilet hmun chu Town huam chhungah telh a nihloh avangin chenna tur in sak leh kudam sak te phal a ni lo tih an sawi a. Godown sak mek leh sak tawhte endikin,  ram pek an nih chhan anga hmang lo chu thiat tura hriattir nise, sa mekte pawh an hnathawh chawlhsan tura hriattir nghal nise an ti bawk.