Aizawl: Aizawl Hunthar veng leimin chhan ber chu lei hnuai a ngheh loh vang niin an sawi a, helai vel thawm thatna tur DPR chu buaipui nghal a niin thehluh thuai tum a ni. Hetih lai hian nimin khan Soil testing turin sample thenkhat chu NIT, Silchar panpui a ni. Disaster Management & Rehabilitation Department hotute hnen atanga Zalen thudawn danin Hunthar veng lei chet chhan ber chu a lei a ngheh loh vang te, tui putchhuak atam avang leh pialtlep chunga awm anih vang tih an sawi a. DM&R Department chuan kum 2014 atang khan an buaipui tan tih sawiin Architecture Interior Engineering Construction te ruaiin tui luankawr siam anih hnuah lei tlahniam a awm tawh lo tih an sawi a; mahse, kuminah beisei loh takin a chhak lamah chhiatna a thleng ta niin an sawi. DM&R Director Lalpeksanga chuan, “Hunthar veng lei tlahniam siam tha tur hian vaibelchhe 15 senna tur DPR kan siam a; mahse, Geological Survey of India report a awm loh avangin siam tha leh turin min ti a. Siam that kan tum mek laiin hetiang chhiatna hi kan tawk ta a, kan van-duai viau rualin chhiat tawkte chhawmdawlna hi DPR ah telh theih kan beisei vangin vanduaina hi vanneihnaah a chang thei a ni,” a ti. Hunthar veng lei tla-hniam enfiah tur hian Thawhtanni kalta khan Shillong atangin Geological Survey of India mi thiam, Senior Geologist pahnih WS Rocky leh G.Rongmei lo kalin an enfiah nghal a, mapping siam nghal tum an ni chungin Mizoram ah leilung enfiahna khawl (Soil Testing Laboratory) a awmloh avangin nimin khan test theihna hnai ber Silchar NIT panpui nghal a ni. GSI mi thiamte chuan rawtna an siamah helai chhehvelah vawk vulh khap te, building lian leh rit thiahte, tui luan kawr mumal zawk siam nise tih leh helai bial velah balhla leh changel te phun loh nise tiin sawrkarah rawtna an thlen nia thudawn a ni.