MSL khelh meka an match hnuhnung bera chak zo lo Tuikual South chuan Chanmari Vikings hnehin Play-in khel turin beiseina thar an nei a, round hmasa lama an lo hneh tawh Zarkawt BCA chu an match hnuhnung ber June ni 30 zan dar 8:30-ah an hmachhawn ang. 

Inkhelh tan tirh phat atangin Tuikual South an che na nghal a, an chak loh nawn chuan play-in an khel phak dawn loh tih an hriatchian avangin player leh fans ten theih tawp an chhuah.

Quarter hmasa berah hian chak mamawh ve tho Vikings lam an bet deuh a, Tuikual South-in 20-16 in an la. Second quarter tan a ni a, team hnih ten point score an harsat ve ve a, chuti chungin Tuikual South lam bawkin hma an hruai leh a, 15-11 in an la leh. Chawlhlawk dar a rik meuh chuan Tuikual South lam hian 35-27 in hma an hruai hman der.

Quarter thumna tan a ni a, Chanmari lamin theih tawp chhuahin an inthlauhna sut kiam an tum. An chak lohna lai siam thain quarter hmasa pahnih aiin an rawn khel tha a, an defence lam pawh a phui tha thawkhat a, 16-14 in hma an hruai let ve thung. Quarter tawpna ber tan a ni a, muthlu harchhuak ang maiin Tuikual South lam an rawn tho chhuak a, point 25-10 zetin hma an rawn hruai let ve leh. Hun tawp hmehrik a rik meuh chuan Tuikual South lam hian 74-53 in hnehna an chang ta a ni. 

He inkhelah hian Tuikual South tan Darrell Bowie chuan a khel tha hle a, point 28 thunin rebound 16 lai a la bawk. Lalnunpuia'n point 17 thunin rebound 5 a chang bawk. Zanin hian Chanmari Vikings foreign player Raymond Edward Miller Jr.-a game a chhuak lo va, point 11 chiah thawk chhuakin rebound pawh 10 chiah a chang a, an check hneh deuh vang nge zan danga a khel a phak lo hle. Vikings tan hian Michael F. Lalawmpuia leh Lalruatkima ten point 10 ve ve an thun bawk.            

Inkhelh hnuhnung zawk Khatla TBL chuan 106-104 in Chawnpui BC an hneh hram a, tihian Khatla TBL hi Zarkawt BCA nen play-in khel turin an tling chiang tawh a ni. 

                       Total Period 1 Period 2 Period 3 Period 4
Tuikual South       74      20       15       14          25
Chanmari Vikings 53      16       11       16          10

TUIKUAL SOUTH BC
Darrell Bowie - 28 pts - 16 rebounds - 2 blocks - 6 assists - 2 steals.
Lalnunpuia - 17 pts - 5 rebounds - 1 block - 1 assist - 2 steals.
Lalfakzuala - 10 pts - 6 rebounds.
Lalfakmawia - 7 pts - 7 rebounds - 1 assist - 1 steal.
F. Zodinthara - 6 pts - 5 rebounds - 2 steals.

CHANMARI VIKINGS
Raymond Edward Miller Jr. - 11 pts - 10 rebounds - 1 block - 3 assists - 1 steal.
Michael F. Lalawmpuia - 10 pts - 7 rebounds - 1 assist - 1 steal.
Lalruatkima - 10 pts - 1 rebound - 2 assists.
Lalruatpuia - 9 pts - 4 rebounds - 1 block - 3 assists.
Lalhlunmawia - 8 pts - 3 rebounds - 3 steals.