ZALEN, Jan. 8, 2025: Tel tuma hmeichhe badminton player 87 hming pekna, category 16-a inelna tur, Girls’ & Women’s Badminton Tournament chu Nilaini khan Ramhlun Indoor Stadium, Aizawlah tan a ni.

He inelna hi Aizawl District Hub for Empowerment of Women (DHEW), Mizoram sorkara Women & Child Development ten TATA Trusts, NEIDA leh Mizoram Badminton Association (MBA) nena tangkawpa a an buatsaih niin Aizawl district huam chhunga hmeichhiate tan leh Mizoram hmun hrang hrang grassroot centre-a inzir mek hmeichhiate tana siam a ni.

Tournament hi January 24, 2025-a National Girl Child Day lawmna pakhat atan leh Beti Bachao Beti Padhao (BBBP) kum 10 tlin puala buatsaih a ni a. Hmeichhiate chawikanna atan leh hmeichhiaten zau zawka an dikna chanvo, an himna atana dân leh service awm te an hriat theih nana tih a ni bawk.

A hawnna inkhawm hi MBA Project Monitoring Committee Secretary Prof. Lalhriatzuala’n a kaihruai a, MBA President Dr Lallianzuala Hnamte, B. Lalrinkima, State Co-ordinator, NEIDA leh Dr Lalhruaitluangi Chhangte, District Programme Officer, WCD ten thu an sawi a. RL Lalengmawii, District Mission Co-ordinator chu resource person niin thu a sawi bawk.